Եվ Հայաստանում, եւ Ադրբեջանում կան անձինք, որոնք միայն ուրախ են ղարաբաղյան հիմնախնդրի սրացման կապակցությամբ: Vesti.Az-ին նման կարծիք է հայտնել ՌԴ նախագահին կից միջազգային հարաբերությունների խորհրդի անդամ, Միջազգային համագործակցության զարգացման աջակցման հիմնադրամի նախագահ Ալեքսանդր Սոկոլովը:
Պատասխանելով նոր պատերազմի հնարավորության մասին հարցին՝ Սոկոլովը հույս է հայտնել, որ Ղարաբաղում նոր պատերազմն անիրատեսական է: «Նույնիսկ ռազմավարական հաղթանակի դեպքում՝այդ պատերազմում կպարտվեն Հարավային Կովկասում ապրող ժողովուրդները: Խնդրի պատերազմական լուծում չկա», - ընդգծել է Սոկոլովը:
Նա նաեւ նշել է, որ ադրբեջանական մամուլում մշտապես տեսնում է այն գաղափարը, որ Լեռնային Ղարաբաղը եւ Հայաստանը նույնը չեն: Կա ՀԱՊԿ պայմանագիր, ուր ընդգրկված են Ռուսաստանը եւ Հայաստանը: «Աստված չանի կոնֆլիկտ ծագի Հայաստանի եւ Ադրբեջանի միջեւ: Եթե թեկուզ մեկ ռումբ ընկնի միջազգային իրավունքի սուբյեկտի վրա, ագրեսիա կհամարվի: Այդ դեպքում ուժի մեջ կմտնեն ՀԱՊԿ պայմանագրի պայմանները», - հայտարարել է Ալեքսանդր Սոկոլովը:
