Հայաստանի Հանրապետության Մշակույթի նախարարության պատվիրակության ներկայացուցիչները գալիք շաբաթվա սկզբին մտադիր են իրենց վրացի գործընկերների հետ հանդիպման ժամանակ բարձրացնել Վրաստանում հայկական պատմամշակութային հուշարձանների պահպանության հարցը։ Խորհրդակցությունները տեղի կունենան Վրաստանում հայկական մշակույթի օրերի շրջանակներում, որոնք կմեկնարկեն մայիսի 3-ին։ Այս մասին NEWS.am-ի թղթակցին հայտնել է ՀՀ մշակույթի փոխնախարար Արթուր Պողոսյանը։

Նրա խոսքով, բանակցությունների ամենակարեւոր հարցերից են լինելու անցած տարի փլուզված Թբիլիսիի «Մուղնեցոց» եկեղեցու վերականգնման հեռանկարներին, ինչպես նաեւ Ախլցխայում «Սուրբ Երերման» եկեղեցու ճակատագրին առնչվող հարցեր։ «Մեր պատվիրակությունը Թբիլիսիում եղել է „Մուղնեցոց“ եկեղեցու փլուզումից երկու օր անց։ Դեռ այն ժամանակ համատեղ ջանքերով վերականգնման աշխատանքներ սկսելու համաձայնություն էր ձեռք բերվել։ Ֆինանսավորման հարցը կլուծվի ավելի ուշ։ Ինչ վերաբերում է „Սուրբ Երերման“ եկեղեցուն, այն կառուցվել է 13-րդ դարում։ 17-րդ դարում եկեղեցին տրվել է տեղի կաթոլիկ համայնքին։ Սակայն եկեղեցում պահպանվել են հին հայկական խաչքարեր եւ գրություններ։ Մենք մտադիր ենք անհանգստություն հայտնել դրանց հետագա ճակատագրի մասին»,- հստակեցրել է Պողոսյանը։

Ինչպես նշել է ՀՀ մշակույթի փոխնախարարը, լուրջ մտահոգություն է առաջացնում նաեւ Թբիլիսիի Պետրոս Ադամյանի անվան հայկական պետական դրամատիկական թատրոնի շենքի վիճակը։ «Թատրոնն այսօր փակման եզրին է։ Դրա շենքը ծայրահեղ վատթար վիճակում է եւ շտապ վերանորոգման կարիք ունի։ Եթե իրավիճակը չփոխվի, շուտով այնտեղ անհնար կլինի ներկայացումներ բեմադրել։ Մենք մեր վրացի գործընկերների հետ մտադիր ենք քննարկել նաեւ այս հարցը»,- ասել է Պողոսյանը։

Հարցին, թե որքա՞ն է բոլոր այս հարցերի լուծման հավանականությունը, ՀՀ մշակույթի փոխնախարարը նկատեց, որ ինքը բավական լավատես է, «քանի որ վրացի գործընկերները միշտ էլ փորձել են ըմբռնումով մոտենալ հայկական կողմի բարձրացրած հարցերին»։