Երեւանի աշխարհաքաղաքական ակումբը Հայրենական մեծ պատերազմում խորհրդային զորքերի հաղթանակի 69-րդ տարեդարձի առթիվ «Հաղթանակ» խորագրով զանգվածային ավտոերթ կանցկացնի:
Երթը կկայանա ապրիլի 29-ին՝ Գյումրիի ( 8.00) «Մայր Հայաստան» հուշահամալիրից «М 1» ավտոմայրուղով-Ագարակ-«Н 20» ավտոմայրուղով Ոսկեվազ-Էջմիածին (Հայրենական մեծ պատերազմում ընկածների հուշարձան)-Երեւան-Ծովակալ Իսակովի պողոտա-Հաղթանակի կամուրջ-Բեյրութի փողոց (Նելսոն Ստեփանյանի հուշարձան)-Հանրապետության հրապարակ-Ազատության հրապարակ-Մարշալ Բաղրամյանի արձան-«Մայր Հայաստան» հուշահամալիր (20.00) երթուղով:
Հայաստանում «Ռուսհամագործակցության» մամուլի ծառայության ղեկավար Լիանա Ազոյանը NEWS.am-ին հայտնեց, որ միջոցառմանը կմասնակցեն Հայաստանի երիտասարդական կազմակերպությունները, ՀՀ ազգային փոքրամասնությունների կազմակերպությունների ներկայացուցիչնեը, «Եկրապահը», «Աֆղանստանի պատերազմի վետերանների միությունը», ՀՀ կասկադյորների ազգային միությունը, բայքերները, հայ-ռուսական կազակական միավորումը, դիվանագիտական հատվածի ներկայացուցիչներ: Միջոցառմանը կարող են մասնակցել բոլոր ցանկացողները:
Ավտոմրցաշարի վերջին կետը լինելու է «Մայր Հայաստան» հուշարձանի մոտ, որտեղ 20.00-ին տեղի կունենան ՀՀ կասկադյորների ազգային միության եւ «Փոքր Մհեր» ուսումնական կենտրոնի սաների ցուցադրական ելույթները, ինչպես նաեւ տոնական համերգ: