Հիվանդ կենդանիներն ու թռչունները ձգտում են իրենց առողջ ձեւացնել, եթե ձագեր ունեն եւ եթե իրենց կողքին պոտենցիալ ամուսնական զուգընկեր են տեսնում կամ, հակառակը, թշնամի:
Հիվանդությունները թաքցնելու ձգտումը հատուկ է ոչ միայն մարդկանց, այլեւ կենդանիներին ու թռչուններին: Եվ, ինչպես մեզ մոտ, նրանց դեպքում նույնպես այդ կախված է սոցիալական կարգավիճակից, ընդ որում, այդ կարգավիճակը մարդկանց ու կենդանիների մոտ նույնն է:
Երբ կենդանին հիվանդ է, սովորաբար քիչ է ուտում, քիչ է խմում, պակաս ակտիվ է եւ շատ է քնում: Սակայն Ցյուրիխի համալսարանից Պատրիսիա Լոպեսը գրում է, որ որոշ իրավիճակներում թռչունը կամ կենդանին իրենց հանգիստ են ձեւացնում: Օրինակ՝ կողքին պոտենցիալ ամուսնական զուգընկերոջ առկայության դեպքում:
«Наука и жизнь»-ի փոխանցմամբ, հիվանդ կենդանու առողջ ձեւանալու մեկ այլ պատճառ էլ մոտակայքում մրցակցի առկայությունն է, որը կարող է գրավել տարածքը: Հասկանալի է, որ թշնամին ավելի շուտ կսկսի հարձակումը, եթե տիրոջը տեսնի թուլացած վիճակում: Այնպես որ՝ տիրոջ շահերից է բխում հիվանդությունը թաքցնելը: Թշնամու կամ պոտենցիալ զուգընկերոջ առկայությունը ստիպում է ընտրություն կատարել. էներգիան ծախսել առողջանալու, թե՞ բազմանալու եւ տարածքը պաշտպանելու համար:
Վերջապես, հիվանդ կենդանիները փորձում են առողջ ձեւացնել, եթե ձագեր ունեն: Այս դեպքում արդեն խնդիրն այն չէ, որ փոքրիկները ծնողներին առողջ տեսնեն: Պարզապես ծնողները պետք է մեծ ջանքեր գործադրեն՝ նրանց կերակրելու համար: Այսինքն՝ կրկին ընտրության խնդիր է ծագում. հոգ տանել ձագուկների, թե՞ սեփական առողջության մասին: