News
Լրահոս
News
Հինգշաբթի
Մայիս 26
USD
447.17
EUR
479.19
RUB
7.04
Տեսնել լրահոսը

Բաթումիի երաժշտական կենտրոնում, օրերս կայացավ Հայաստանի վավերագրական ֆիլմերի «Հայկ» կինոստուդիայի կողմից, ՀՀ Մշակույթի նախարարության պատվերով նկարահանված «Հայերն Աջարիայում» (սցենարի հեղինակ` Ռուբեն Գեւորգյանց, ռեժիսոր Գեորգի Կեւորկով) վավերագրական ֆիլմի շնորհանդեսը:

Արարողությանը ներկա էին Բաթումում ՀՀ գլխավոր հյուպատոս Արամ Գրիգորյանը, Բաթումի քաղաքապետի պաշտոնակատար Գիորգի Երմակովը, Ինքնավար հանրապետության Գյուղատնտեսության նախարար Զաուր Փութկարաձեն, Աջարիայի կառավարության աշխատակազմի, քաղաքապետարանի աշխատակիցներ, տասնյակ բաթումահայեր, ԶԼՄ-ների ներկայացուցիչներ:

 Ֆիլմը պատմում է Աջարիայում ու մասնավորապես Բաթումում հայկական համայնքի ստեղծման նախադրյալների, աջարահայության այսօրվա կյանքի, հայաբնակ վայրերի ու առանձին շինությունների եւ այլնի մասին: Ֆիլմում կարեւորվել է Բաթումի բացառիկ դերը հայ ժողովրդի պատմության ծանրագույն պահերին մեր հայրենակիցների ընդունման ու պատսպարման հարցում, եւ այդ ամենի մասին պատմում են Աջարիայի ինչպես հայ, այնպես էլ վրացի բնակիչները:

Իր բացման խոսքում Բաթումում ՀՀ գլխավոր հյուպատոս Արամ Գրիգորյանն ընդգծեց նման ֆիլմերի դերը եղբայրական ժողովուրդների էլ ավելի մերձեցման, տեղի հայության` վրաց հասարակության մեջ հետագա ինտեգրման, մեր աշխարհասփյուռ գաղթօջախների պատմության վերհանման հարցերում: Ֆիլմի ռեժիսոր Գեորգի Կեւորկովը ներկայացրեց հատուկ Բաթում ժամանած նկարահանող խմբի անդամներին, պատմեց ֆիլմի` անցյալ տարվա սեպտեմբերին իրագործված նկարահանումների մասին:

Ֆիլմի ցուցադրումից հետո ֆիլմի վերաբերյալ իրենց կարծիքը հնչեցրին Բաթումի քաղաքապետի պաշտոնակատար Գիորգի Երմակովը, աջարահայության հոգեւոր հովիվ Արարատ քահանա Գումբալյանը, «Աջարիայի հայերի միություն» համայնքային կազմակերպության նախագահ Գրիգոր Վարդանյանը:

«Հայերն Աջարիայում» ֆիլմը ջերմ ընդունելության արժանացավ բոլոր ներկաների կողմից:

!
Այս նյութը հասանելի է նաև   Русский
Տպել
Ամենաշատ