Հայաստանը ցնցված է տեղի ունեցած ողբերգությամբ՝ քաղաքացիական ինքնաթիռի կործանմամբ, որի հետեւանքով 298 մարդ է զոհվել։ Այդ մասին NEWS.am-ի հարցմանն ի պատասխան հայտնել է ԱԳՆ մամուլի քարտուղար Տիգրան Բալայանը՝ ներկայացնելով ՀՀ արտգործնախարարության արձագանքը երեկ Ուկրաինայի հարավ-արեւելքում տեղի ունեցած ավիավթարի վերաբերյալ:
«Մեր վշտակցությունն ենք հայտնում բոլոր անմեղ զոհերի հարազատներին, բոլոր այն երկրներին, որոնց քաղաքացիները ողբերգության հետեւանքով կորցրել են իրենց կյանքը։ Հայաստանի Հանրապետության Նախագահը՝ հայ ժողովրդի անունից, արդեն ցավակցան հեռագրեր է հղել Մալազիայի եւ Նիդերլանդների ղեկավարներին»,- նշել է նա։
Հարցին, թե ինչպե՞ս կմեկնաբանի տեղեկությունները, որ ինքնաթիռը կործանվել է հրթիռակոծության հետեւանքով, Տիգրան Բալայանը պատասխանել է. «Ավիավթարի պատճառների վրա լույս կարող է սփռել միայն միջադեպի համապարփակ քննությունը։ Հայաստանը մշտապես դատապարտել է եւ շարունակում է բացարձակապես անընդունելի համարել ուժի կիրառումը եւ ուժի գործադրման սպառնալիքը քաղաքացիական օդանավերի նկատմամբ»։
