Հայ Առաքելական եկեղեցու Վիրահայոց թեմը համաձայն չէ հայկական Սուրբ Էջմիածին եկեղեցու մոտ տեղի ունեցած միջադեպի առնչությամբ Վրաստանի ՆԳՆ գնահատականի հետ եւ ձգտելու է հասնել մանրակրկիտ հետաքննության եւ գործի համարժեք որակավորման: Այս մասին հայտարարել է Վիրահայոց թեմի մամուլի խոսնակ Սուսաննա Խաչատրյանը:
«Մենք համաձայն չենք, որ այդ սովորական խուլիգանություն է, եւ հետաքննություն ենք պահանջելու»,- Խաչատրյանի խոսքերն է մեջբերում Новости-Грузия-ն:
Նշենք, որ Վրաստանի ՆԳՆ-ն հայտարարել է, որ միջադեպն ազգային բնույթ չի կրել եւ տեղի է ունեցել կենցաղային հողի վրա: Քրեական գործ է հարուցվել 125 հոդվածով (ծեծկռտուք):
Թեմի իրավաբան Լեւոն Իսախանյանը նշել է, որ Վիրահայոց թեմը ՆԳՆ-ից միջադեպին արձագանքելու վերաբերյալ պաշտոնական ծանուցում դեռեւս չի ստացել: Նրա խոսքով, միջադեպի արդյունքում հայկական եկեղեցու հինգ հոգեւորական է տուժել:
«Մինչ այս եզակի դեպքեր են եղել, երբ կարելի էր խոսել ազգային կամ կրոնական հիմքով վիրավորանքի մասին: Այն, ինչ տեղի ունեցավ, նման ծավալով առաջին միջադեպն էր: Կարեւորը՝ անել ամեն ինչ, որպեսզի նման բան այլեւս չկրկնվի»,- ասաց Իսախանյանը:
