Հայ ձեռնարկատեր եւ բարերար Լեւոն Հայրապետյանի կալանքը հակասում է Ռուսաստանի օրենսդրությանը, քանի որ հիվանդությունների նման շարքի պայմաններում նրան իրավունք չունեին ձերբակալել: Այդ մասին այսօր՝ հուլիսի 22-ին լրագրողների հետ զրույցում ասել է Հայրապետյանի փաստաբաններից Արթուր Սաֆարյանը:
Նրա խոսքով՝ ներկայումս Լեւոն Հայրապետյանը գտնվում է Ռուսաստանի դաշնային ծառայության N1 վարչության պատիժների իրականցման «Մատրոսկայա տիշինա» քննչական մեկուսարանում: Ի պատասխան հարցին՝ արդյոք Հայրապետյանի կալանքը քաղաքական ենթատեքստ ուներ, իրավապաշտպանը նշել է. «Իմ կարծիքով սա քաղաքական պատվեր է»:
Հիշեցնենք, որ գործարար Լեւոն Հայրապետյանը կալանավորվել է Մոսկվայի Բասմանի դատարանում: Ձեռնարկատիրոջը մեղադրանք է ներկայացվել՝ ըստ ՌԴ քրեական օրենսգրքի 174 եւ 160 հոդվածների: Հայրապետյանը կալանավորվել է 2 ամսով: