Ջրաշխարհին կից անտառների ծառերը չեն հատվում, այնտեղ պարզապես զբոսայգի է կառուցվում։ Այս մասին NEWS.am-ին ասաց Երեւանի քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը՝ հերքելով «Մենք ենք այս քաղաքի տերը» քաղաքացիական նախաձեռնության տարածած հայտարարությունը, թե այնտեղ շինություն է կառուցվում:
«Չի համապատասխանում իրականությանը տարածած հայտարարությունը, որովհետեւ այնտեղ նախատեսվում է զբոսայգի կառուցել, որի վերաբերյալ որոշում Երեւանի ավագանին կայացրել է դեռ հոկտեմբերին: Այդ հատվածում լինելու է հանգստյան գոտի: Մարտի 26-ին Երեւանի քաղաքապետարանի կայքում տեղադրվեց հայտարարություն այն մասին, որ Երեւանի ավագանու ՀՀԿ խմբակցության անդամ Հովհաննես Թոքմաջյանը ներկայացրել է Ճարտարապետաշինարարական համալսարանի ուսանողների նախագիծը, թե ինչպիսի հանգստյան գոտի է լինելու»,- ասաց Արթուր Գեւորգյանը:
Նշենք, որ ըստ քաղաքացիական նախաձեռնության՝ հուլիսի 29-ին Նոր Նորքի բնակիչները նկարահանել են, թե ինչպես են ջրաշխարհին կից անտառներում բուլդոզերները մեկը մյուսի ետևից ջարդում ծառերը: Այս անօրինական գործողությունները տեղի են ունենում քաղաքապետ Տարոն Մարգարյանի հովանավորությամբ:
«Այս բարբարոսությունը հավանաբար կապված է վերջերս Վիշապների պուրակի փոխարեն այս հատվածում կառուցված բարձրահարկի համար խաղահրապարակ ստեղծելու մասնավոր խնդրի հետ»,- նշվում է հայտարարության մեջ։