Հայաստանի եւ Ռուսաստանի նախագահներ Սերժ Սարգսյանն ու Վլադիմիր Պուտինը Սոչիում կայացած հանդիպման ժամանակ քննարկել են տարբեր ոլորտներում հայ-ռուսական փոխգործակցության արդիական հարցերն ու ղարաբաղյան հակամարտության կարգավորման ուղիները:
Կրեմլի մամուլի ծառայության փոխանցմամբ, Վլադիմիր Պուտինը, մասնավորապես, հայտարարել է. «Ինձ հարկավոր չէ բնորոշել հայ-ռուսական հարաբերությունները, դրանք բացառապես բարեկամական, ռազմավարական բնույթ են կրում, ինչի մասին է վկայում Հայաստանի, հայաստանյան ղեկավարության վերջին՝ ե´ւ Մաքսային միությանը, ե´ւ Եվրասիական տնտեսական միությանն անդամակցելու որոշումը: Աշխատանքը շարունակվում է, եւ ես կցանկանայի տեղեկացնել ձեզ, թե այսօր այն ինչ փուլում է: Բնականաբար, մենք նաեւ երկկողմ հարաբերություններին վերաբերող օրակարգային բազմաթիվ հարցեր ունենք, որոնց մասին այսօր, անկասկած, կխոսենք: Նաեւ ղարաբաղյան հակամարտության կարգավորման հետ կապված խնդիրները մանրամասն քննարկելու հնարավորություն կա: Այդ պատճառով, մեր օրակարգը բավական հագեցած է»:
Հայաստանի նախագահ Սերժ Սարգսյանն էլ նշել է, որ ռուսաստանցի գործընկերոջ հետ վերջին հանդիպումից երեք ամիս է անցել, եւ մի շարք պայմանավորվածություններ ամփոփելու անհրաժեշտություն կա: «Բացի մեր երկկողմ հարաբերությունների օրակարգից, ես կցանկանայի նաեւ քննարկել որոշ հարցեր՝ կապված ինտեգրման գործընթացների հետ, որոնք առնչվում են Եվրասիական տնտեսական միության հաձայնագրին Հայաստանի միանալուն:
Իհարկե, մեզ անհանգստացնում է նաեւ Ուկրաինայի իրավիճակը: Եթե Դուք կարեւոր համարեք, պարոն Պուտին, տեղեկացրեք, խնդրում եմ, այն միջոցառումների մասին, որոնք ձեռնարկում է Ռուսաստանը, իսկ ես իմ հերթին Ձեզ մանրամասն կտեղեկացնեմ մեր տարածաշրջանի իրադրության եւ հայ-ադրբեջանական սահմանին ու ղարաբաղա-ադրբեջանական շփման գծում Ադրբեջանի կողմից իրավիճակի կանխամտածված սրման մասին»,- նշել է Սերժ Սարգսյանը:
Հավելենք, որ ավելի վաղ կայացել էին նաեւ Վլադիմիր Պուտինի եւ Ադրբեջանի նախագահ Իլհամ Ալիեւի բանակցությունները, որոնք ընթացքում նույնպես քննարկվել է ղարաբաղյան հիմնախնդիրը:
