Ուկրաինայում, Իրաքում, Լիբիայում, Սիրիայում եւ Գազայում վերջին ամիսների ահավոր դեպքերից, ինչպես նաեւ արեւմտյան Աֆրիկայում Էբոլա տենդի տարածումից հետո աշխարհն «անկանխատեսելի» անվանելն ադեկվատ գնահատական չի թվում: Այս մասին իր բլոգում ՆԱՏՕ-ի գագաթաժողովի առթիվ գրել է ՀՀ-ում Մեծ Բրիտանիայի դեսպան Քեթրին Լիչը:
Ըստ նրա՝ անկայունությունը տարածվել է նաեւ Հյուսիսային Աֆրիկայում եւ Մերձավոր Արեւելքում՝ Իսլամական պետության գրոհայինների բարբարոսական դրսեւորումներով Սիրիայում եւ Իրաքում, որտեղ դաժանաբար ավերվում է կրոնների եւ ժողովուրդների պատմական խճանկարը, այդ թվում՝ հայկական կարեւոր համայնքներինը: «Եվ անվտանգության այս աննախադեպ մարտահրավերները ՆԱՏՕ-ի գագաթաժողովի ֆոնն են, որը Ուելսում կանցկացվի սեպտեմբերի 4-5-ին»,- գրում է դեսպանը:
Քեթրին Լիչը կանգ է առնում գագաթաժողովի երեք հիմնական թեմաների վրա. Ռուսաստանի գործողություններն Ուկրաինայում, Աֆղանստանում ISAF-ի առաքելության փոխակերպումը՝ տեղի իշխանություններին աջակցելու համար, ինչպես նաեւ ամենաարժեքավոր գործընկերների հետ հարաբերությունների խորացումը:
ՆԱՏՕ-ի գագաթաժողովի առաջին օրը նվիրված է 24 երկրների հարաբերություններին, որոնք ISAF-ի մաս էին կազմում՝ մեր ամենաարժեքավոր գործընկերներին: Հայաստանը մեկն է դրանցից. լինելով ՀԱՊԿ անդամ՝ այն աննախադեպ կերպով մասնակցում էր նաեւ Աֆղանստանի եւ Կոսովոյի խաղաղապահ առաքելություններին՝ վերջին 10 տարում: «Հայաստանի ավանդն ISAF-ում այս պահին ավելին է, քան ՆԱՏՕ-ի որոշ գործընկեր երկրներինը, եւ միայն աննշան է զիջում Ֆրանսիայի ավանդին»,- գրում է դիվանագետը:
«Երրորդ, մենք ցանկանում ենք ամրապնդել հարաբերությունները առավել արժեքավոր գործընկերների, այդ թվում՝ Հայաստանի հետ, եւ «համատեղության» հարաբերություններ կառուցել, միասին աշխատելու ունակություն, որի ուղղությամբ աշխատել ենք վերջին 10 տարիներին: Չկայացած պետությունների, տարածաշրջանային հակամարտությունների, ահաբեկչության եւ կիբերհարձակումների այս անկայուն աշխարհում պաշտպանունակության եւ համագործակցության հասնելու համար համատեղ աշխատանքն այսօր կարեւոր է, քան երբեւէ: Մենք ցանկանում ենք աշխատել նրանց հետ, ովքեր կիսում են մեր արժեքները եւ գնահատում գործընկերությունը»,- կարծում է դեսպանը:
Եվ վերջապես, ըստ Լիչի, գագաթաժողովը լավ հնարավորություն է Ուելսի վրա լույս սփռելու համար:
Լիչի խոսքով՝ Հայաստանի նման Ուելսն էլ փոքր, գեղեցիկ եւ հպարտ երկիր է՝ հայտնի իր ավանդույթներով, երաժշտությամբ, հյուրասիրությամբ եւ հանրահայտ կարմիր վիշապով: «Մեզ համար մեծ պատիվ է հյուրընկալել նախագահ Սարգսյանին ու հայկական պատվիրակությանը՝ ISAF-ի մեր արժեքավոր գործընկերներին, ՆԱՏՕ-ի այս տարվա գագաթաժողովում: Բարի գալուստ Ուելս»,- ընդգծել է դեսպանը: