Հայաստանում ոսկերչական ոլորտի համար ազատ գոտին ինձ՝ որպես հայի համար հետաքրքիր նախագիծ է: Այդ մասին հայ ոսկերիչների համաշխարհային միության (AJA) կողմից Երեւանի «Մերիդան» ցուցահանդեսի կենտրոնում կազմակերպած «Yerevan Show – 2014» ոսկերչական ցուցահանդեսին NEWS.am-ի թղթակցին հայտարարեց Դոնի Ռոստովի ձեռնարկատեր Միխայիլ Բալայանը:
«Ինձ հետաքրքիր է այս նախագիծը, քանի որ որպես նորմալ մարդ՝ ես սիրում եմ իմ երկիրը, իմ հայրենիքը: Կարելի է մասնակցել, ուսումնասիրել: Թեեւ դեռ ամեն ինչ այդքան հասկանալի չէ, սակայն երեւում է, որ շատերն են շահագրգռված ներգրավված, մասնավորապես ռուսական կապիտալի հետ աշխատելու հարցում», - հստակեցրեց նա:
Միակ հարցը, որին դեռեւս հստակ պատասխան չի տրվել, թե ինչ կլինի 2017թ.ԱՏԳ-ի հետ, երբ ավարտվի Եվրասիական տնտեսական միությանը Հայաստանի անդմակցության անցումային շրջանը: «Ներդրումներ պետք է կատարել առնվազն մի քանի տարվա համար, հատկապես ոսկերչական ոլորտում: Սարքերն այստեղ էժան չեն եւ գնվում են դոլարով ու եվրոյով, որոնք ամեն օր թանկանում են ռուբլու նակտմամբ», - նկատեց ձեռնարկատերը:
Նա հավելեց, որ Հայաստանն իրեն գրավում է նաեւ անձնակազմի աշխատավարձի մակարդակով ու վարպետների մեծ թվով: «Ընտրելու համար մեծ հնարավորություն կլինի: Եթե Ռուսաստանում լավ վարպետները ոսկու կշիռ ունեն, ապա այստեղ ոսկու կշիռ ունի աշխատավարձ է վճարողը»:
Բաքվում ծնված Բալայանը ղեկավարում է Դոնի Ռոստովի ոսկերչական ձեռնարկությունը եւ զբաղվում է տղամարդկանց համար աքսեսուարների արտադրությամբ: Նրա մոտ աշխատում են ինչպես հայեր (այդ թվում՝ Երեւանից եւ Ղարաբաղից), այնպես էլ ռուսներ: