Ադրբեջանն ինչպես միշտ ցույց տվեց իր դեմքը` կոպտորեն խախտելով գոյություն ունեցող բոլոր նորմերը: Այս մասին այսօր` նոյեմբերի 14-ին, Արցախում ընթացող «Միասնություն 2014» զորավարժությունների ժամանակ լրագրողների հետ զրույցում ասաց ՀՀ պաշտպանության նախարար Սեյրան Օհանյանը` անդրադառնալով նոյեմբերի 12-ին ղարաբաղա-ադրբեջանական չեզոք գոտում խոցված հայկական ուղղաթիռին: (ֆոտոռեպորտաժ)
«Այս զորավարժությունների միակ դժվարությունը խոցված ուղղաթիռն էր: Հայաստանի եւ Լեռնային Ղարաբաղի ղեկավարությունները զորավարժությունների մասին հայտարարել էին եւ Ադրբեջանի գործողությունները ցույց տվեցին նրա դեմքը, որովհետեւ նրանք կոպտորեն խախտել են առկա բոլոր նորմերը: Ցավալի դեպք է տեղի ունեցել մեզ համար, իրենց կողմից լկտի գործողություններ են կատարվել, եւ մեր պատասխանը լինելու է մի քիչ էլ անհամաչափ»,- ասաց նախարարը:
Նրա խոսքով` տեղի ունեցածը ոչ մի կերպ չի ազդել ընթացող զորավարժությունների գործողությունների վրա:
Նշենք, որ զորավարժությունները սկսվել են նոյեմբերի 6-ին եւ կավարտվեն վաղը` նոյեմբերի 15-ին:
Լուսանկարը՝ Արսեն Սարգսյանի/NEWS.am