Արցախի զինված ուժերի հատուկ նշանակության ստորաբաժանումների զինծառայողները հատուկ գործողությանը պատրաստվել են օրեր շարունակ, հայկական զինուժի մասնագետները նախապես պլանավորել են ամեն ինչ, ուսումնասիրել բոլոր մանրուքները, այնուհետեւ անցել գործի: Այս մասին հայտնել է ԼՂՀ ՊԲ-ում NEWS.am-ի աղբյուրը:
Աղբյուրի փոխանցմամբ՝ Ադրբեջանը իմացել է, որ հայերը գնալու են խոցված ուղղաթիռի հետեւից, ուստի ծուղակ էին պատրաստել ուղղաթիռի շրջակայքում, սակայն հայ զինծառայողները նախ վերացրել են ծուղակը, այնուհետեւ մոտեցել են ուղղաթիռին: Այդ ընթացքում նրանք ոչնչացրել են լուսարձակ պահող ադրբեջանցուն ու նրա կողքին կանգնած զինծառայակցին, դա արել են անաղմուկ, այնպես, որ արդրբեջանական կողմի հերթափոխում ոչինչ չեն իմացել։
Աղբյուրի փոխանցմամբ՝ ուղղաթիռը խոցվելուց երկու մասի է բաժանվել, մի մասը այրվել է, իսկ քթամասին գտնվող զինծառայողի դին պահպանվել է, քանի որ այն չի այրվել։
Ավելի վաղ NEWS.am-ը հաղորդել էր, որ հաշվի առնելով Ադրբեջանի կողմից ինչ-որ մեկին ուղղաթիռին մոտ թողնելու կտրուկ մերժումները, ԼՂՀ ՊԲ հրամանատարությունը մարտական խնդրի կատարման արդյունքում դեպքի վայրից տարհանել է ուղղաթիռի անձնակազմից մեկի դին, երկու օդաչուների մասունքները և ուղղաթիռի որոշ անհրաժեշտ մասեր։
Նշենք, որ խոցված ուղղաթիռի զոհված երեք օդաչուներն են ուղղաթիռի հրամանատար մայոր Սերգեյ Սահակյանը, երկու զինծառայողներ, լեյտենանտ Ազատ Սահակյանը եւ ավագ լեյտենանտ Սարգիս Նազարյանը:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: