Այսօր` հուլիսի 3-ին Կիեւում բացվել է «ԱՊՀ երկրների ակտիվ երիտասարդությանը սոցիալական ծառայությանը ներգրավելու ինովացիոն մեթոդների մշակում եւ փորձարկում» թեմայով Միջազգային երիտասարդական ֆորումը: Ֆորումին մասնակցում են ԱՊՀ 8 երկրների շուրջ 120 ներկայացուցիչներ, որոնք 5 օրերի ընթացքում կքննարկեն երիտասարդությանը սոցիալական օգտակար գործունեության մեջ ներգրավելու հարցերը:
Ինչպես NEWS.am-ը տեղեկանում է ԱՊՀ անդամ երկրների հումանիտար համագործակցության միջպետական հիմնադրամի մամուլի ծառայությունից, Ֆորումի կազմակերպիչները վստահ են, որ Միջազգային երիտասարդական ֆորումի ծրագիրը թույլ կտա միավորել ԱՊՀ երկրների սկաուտական կազմակերպություններին եւ ստեղծել գործուն ծրագրեր, որոնք կխթանեն երիտասարդության հետաքրքրությունը սոցիալական օգտակար գործունեության նկատմամբ:
Ֆորումը կավարտվի հուլիսի 7-ին` կլոր սեղանի կազմակերպմամբ, որտեղ կմասնակցեն ԱՊՀ երկրների պետական կառույցների, գիտական ու ստեղծագործական մտավորականության, Ուկրաինայում հավատարմագրված դիվանագիտական առաքելությունների ներկայացուցիչներ ու հասարակական գործիչներ:
Ֆորումին մասնակցում են երիտասարդներ Հայաստանից, Ադրբեջանից, Բելառուսից, Ղազախստանից, Մոլդովայից, Տաջիկստանից, Ռուսաստանից ու Ուկրաինայից:
