Ադրբեջանի կողմից նոյեմբերի 12-ին հայկական ուղղաթիռին խոցելու դեպքով ծառայողական քննություն անցկացնելու համար ստեղծված է հատուկ հանձնաժողով: NEWS.am-ի թղթակցի հետ զրույցում Պաշտպանության նախարարի մամուլի խոսնակ Արծրուն Հովհաննիսյանը ասաց, որ հանձնաժողովը ղեկավարում է գլխավոր շտաբի տեղակալներից մեկը, կազմում ընդգրկված են տասնյակ անձինք՝ ՊՆ բարձրաստիճան պաշտոնյաններ, քննիչներ, փորձագետներ: Քննության արդյունքում, մամուլի խոսնակի փոխանցմամբ, պարզ կլինի միջադեպի բոլոր մանրամասները, կունենանք ամբողջական պատկեր: «Ծառայողական քննությունը մշտական պրոցես է, որը նշանակվում է բանակում տեղի ունեցած յուրաքանչյուր դեպքի վերաբերյալ: Այս անգամ հակառակորդը գործել է աննախադեպ, այսինքն՝ նախկինում նման բան չէր արել, ուստի իրավիճակի հստակեցումը, հանգամանքների պարզումը կարեւոր է մեզ համար, այդ նպատակով էլ նշանակված է ծառայողական քննություն: Այն կտա մի շարք հարցերի պատասխաններ, պարտադիր չէ, որ դուք դրա տակ մեղավորներ փնտրեք, դա չի արվում հատուկ մեղավոր փնտրելու համար, եթե մեղավոր լինի, կպարզվի, բայց մեզ համար առաջնահերթ է իրավիճակի ուսումնասիությունը»,-ասաց Արծրուն Հովհաննիսյանը:
Ի դեպ, արդեն փորձաքննության են ուղղարկված խոցված ուղղաթիռի մասերը, սակայն թե երբ կլինի դրանց պատասխանը, կհրապարակվի դա, թե ոչ, դեռ հայտնի չէ: Ուղղաթիռի սեւ արկղը կվերծանեն այստեղ հայ մասնագետների ուժերով: Նա նշեց, որ պատրաստ են ուսումնասիրության բոլոր նյութերը տրամադրել միջազգային կազմակերպություններին, որպես իրենց համար հստակ լինի ճշմարտությունը:
Նշենք, որ ուղղաթիռի խոցման դեպքով հարուցված է նաեւ քրեական գործ ազգային ատելության շարժառիթով երկու եւ ավելի անձանց սպանության, գույքի դիտավորյալ ոչնչացնելու համար:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։