Արցախյան զինուժի կործանված ուղղաթիռի գործում Հայաստանի պաշտպանության նախարար Սեյրան Օհանյանի դիրքորոշումն արժանի է հարգանքի: Այս մասին նոյեմբերի 28-ին Երեւանում լրագրողների հետ հանդիպման ժամանակ հայտարարեց Հայաստանում ԱՄՆ դեսպան Ջոն Հեֆերնը:
Դեսպանությունը, հավելեց նա, ուշադիր հետեւում էր իրադրության զարգացմանը՝ հայկական պաշտոնատար անձանց, այդ թվում՝ պաշտպանության եւ արտաքին գործերի նախարարների եւ փոխնախարարների հետ յուրաքանչյուր հանդիպումից հետո խորհրդակցելով Պետքարտուղարության հետ: Նպատակն էր վառ պատկերացում կազմել կատարվածի վերաբերյալ եւ աշխատանքներ սկսել կողմերի հետ՝ իրավիճակի սրումից խուսափելու համար:
«Ինձ վրա մեծ տպավորություն թողեց այն, թե ինչն էր կարեւոր նախարարի համար. վերադարձնել երեք օդաչուների մարմինները: Նրա համար առաջնային նպատակն էր զինվորականների մարմիններն ընտանիքներին վերադարձնելը՝ պատշաճ կերպով հուղարկավորելու համար»,- ընդգծեց Հեֆերնը:
«Դա նրան հաջողվեց անել: Այդ պատճառով ես չեմ կարող հարգանք չարտահայտել նրա հետեւողականության եւ գործն ավարտին հասցնելու ունակության համար»,- հավելեց դեսպանը:
Հարցին, ԱՄՆ-ն պատրա՞ստ է աջակցել միջադեպի հետաքննությանը, եթե նման խնդրանք լինի, Հեֆերնը նշեց, որ նախարար Օհանյանը մեկ բան է խնդրել. ԵԱՀԿ Մինսկի խմբի համանախագահների հայտարարությունը, որն Ադրբեջանին կոչ կանի աջակցել զինծառայողների մարմինների վերադարձին:
«Մենք հանդիպեցինք ուղղաթիռի կործանումից երեք օր անց: Ես հեռախոսով խոսեցի պարոն Ուորլիքի հետ (ԵԱՀԿ Մինակի խմբի ամերիկացի համանախագահի - խմբ.), ինչից հետո մենք զրուցեցինք նրա ֆրանսիացի եւ ռուսաստանցի գործընկերների հետ: Դրանից կարճ ժամանակ անց համանախագահները նման բովանդակությամբ հայտարարություն հրապարակեցին»,- ընդգծեց Հեֆերնը:
Արդյո՞ք դա օգնեց գործին՝ հայտնի չէ, բայց, ըստ ԱՄՆ դեսպանի, իր համար շատ կարեւոր էր, դիվանագետները կարողացան ամբողջությամբ բավարարել նախարարի խնդրանքը: «Հայաստանին հաջողվեց վերադարձնել մարմինները, եւ դա արժանի է հարգանքի. դա սպանված օդաչուների հանդեպ պարտքն էր»,- հայտարարեց Հեֆերնը:
Նոյեմբերի 12-ին ադրբեջանական զինված ուժերի կողմից խփվեց արցախյան ռազմաօդային ուժերի՝ ուսումնավարժական թռիչք իրականացնող ուղղաթիռը: Չեզոք գոտում ուղղաթիռի ընկնելուց հետո ադրբեջանական ԶՈՒ-ն շարունակել է գնդակոծությունը՝ այդ վայր չթողնելով ինչպես Հայաստանի եւ Արցախի, այնպես էլ ԵԱՀԿ եւ Կարմիր խաչի միջազգային կոմիտեի ներկայացուցիչներին:
Հաշվի առնելով Ադրբեջանի իշխանությունների կտրուկ մերժումը՝ որեւէ մեկին ուղղաթիռին մոտ թողնելու վերաբերյալ, նոյեմբերի 22-ին ԼՂՀ պաշտպանության բանակը հատուկ գործողություն իրականացրեց, որի ընթացքում դուրս բերվեցին օդաչուներից մեկի մարմինն ու մյուս երկուսի մնացորդները, ինչպես նաեւ ուղղաթիռի որոշ կտորներ՝ փորձաքննության համար: Գործողության իրականացման ժամանակ ադրբեջանցի երկու զինվոր է սպանվել:
