Ադրբեջանական լրատվամիջոցները շարունակում են հասարակական կարծիքի հարցումներ անցկացնել հուզող տարբեր հարցերի շուրջ:
Հերթական հարցումը, որը հայտնվել է contact.az կայքում, վերաբերում է ադրբեջանցիների կողմից արցախյան ուղղաթիռի ոչնչացմանը: Հարցումը վերնագրված է «Ճի՞շտ էր, արդյոք, հայկական ուղղաթիռի կործանման որոշումը»: Հարցվողներին պատասխանի երեք տարբերակ է առաջարկվում. «Այո, ճիշտ էր», «Ոչ, ճիշտ չէր, դա կարող է սրել իրավիճակը» եւ «Դժվարանում եմ պատասխանել»: Հարցմանն առայժմ 331 մարդ է մասնակցել:
Մյուս հարցումը նվիրված է Արցախում մեղադրյալի աթոռին հայտնված ադրբեջանական դիվերսիոն-հետախուզական խմբի երկու անդամներին: Հարցումը վերնագրված է «Ի՞նչ եք մտածում քելբաջարցի պարտիզանների գործողությունների մասին»: Հարցվողներին պատասխանի երեք տարբերակ է առաջարկվում. «Արդարացնում եմ նրանց գործողությունները: Նրանք ցանկացել են այցելել հարազատ վայրեր եւ դատապարտելի ոչ մի բան չեն արել», «Դա հիմար արկածախնդրություն էր, որը թանկ կարժենա պարտիզաններին եւ տառապանք կբերի նրանց հարազատներին», ինչպես նաեւ ավանդական «Դժվարանում եմ պատասխանել» տարբերակը: Հարցմանը 520 մարդ է մասնակցել: Թե ինչպես են բաժանվել ձայները, չի հաղորդվում:
Հիշեցնենք, որ առաջին դեպքում խոսքը սադրանքի եւ Ժնեւի կոնվենցիայի խախտման մասին է, իսկ երկրորդ դեպքում՝ քրեական մի շարք հանցագործությունների:
