Հայաստանի անդամակցումը Եվրասիական միությանը փորձություն է, որը երկիրը պետք է անցնի «այն, ինչ չի սպանում, ուժեղացնում է» սկզբունքով, դեկտեմբերի 4-ին ԱԺ-ում ԵՏՄ-ին անդամակցության պայմանագրի քննարկման ընթացքում հայտարարել է ՀՅԴ խմբակցության ղեկավար Արմեն Ռուստամյանը:
Ըստ նրա՝ ինքը համամիտ է այն պնդումներին, որ կարելի էր պայմանագիրը կազմելիս բանակցություններն ավելի լավ վարել, ամրացնել դիրքերը: «Բայց այսօրվա որոշումը պետք է կայացնել իրավիճակից ելնելով: Հայաստանն ու ԼՂՀ-ն շրջափակման եւ ռազմական դրության մեջ են: Աշխարհը սառը պատերազմի վիճակում է: Գերտերությունների միջեւ ազդեցության համար պայքարը հանգեցրել է ուղիղ բախման: Հայաստանի համար կարեւոր է հարցը՝ ինչպես վարվել տվյալ իրավիճակում: Օգնության են գալիս ասացվածքները՝ պատերազմում, ինչպես պատերազմում եւ երբ կրակում են թնդանոթները, մուսաները լռում են: Հետեւաբար բոլոր քնարական շողումները եւ դասեր տալու փորձերն անընդունելի են, առավել եւս, որ ուսուցիչներն իրենք չեն յուրացրել դասը: Դասեր տալու ժամանակը չէ, սովորելու եւ ստեղծված իրավիճակի վրա կենտրոնանալու ժամանակն է», - ասել է նա:
Արմեն Ռուստամյանը միաժամանակ հավելել է, որ եթե խաղաղություն ենք ուզում, պետք է պատերազմի պատրաստվենք, եւ ավելի լավ է այդ հարցով զբաղվենք:
«Մեր խնդիրն է հաջորդ սերունդների փոխանցել 42 հազար քկմ հայկական հող, որպեսզի համարձակ նայենք նրանց աչքերին: Եթե դու երկրի անվտանգությունն ապահովելու ավելի լավ այլընտրանք չունես, պետք է պահպանես արդեն ունեցածը: ՀՅԴ-ի համար այդ պայմանագիրը երկրի անվտանգության հարցի լուծում է: