Հայ-թուրքական հարաբերությունների կարգավորման գործընթացի հետագա զարգացումները չարժե կապել այն հայտարարության հետ, ըստ որի՝ Թուրքիայի արտգործնախարարությունը Կարսի նահանգապետ Ահմեդ Քարայից հայ-թուրքական սահմանակետի վիճակի վերաբերյալ տվյալներ է պահանջել։ NEWS.am-ի թղթակցի հետ զրույցում նման կարծիք հայտնեց Քաղաքական և միջազգային հետազոտությունների հայկական կենտրոնի փորձագետ Ռուբեն Մեհրաբյանը։
Նրա խոսքով, նմանատիպ հայտարարությունները զուտ տեխնիկական բնույթ են կրում։ «Թուրքիայի արտգործնախարարությունը վերոնշյալ հարցով դիմել է սահմանամերձ նահանգի նահանգապետին, նա էլ պատասխանել է գերատեսչությանը։ Ես դրանից հեռուն գնացող հետեւություններ չէի անի։ Սա պարզապես մամուլի համար լավ նյութ էր, որով իշխանությունները փորձում են տպավորություն ստեղծել, որ այդ հայտարարությանը ինչ-որ բաներ են հետեւելու»,- համոզմունք հայտնեց Մեհրաբյանը՝ հավելելով, որ հայ-թուրքական գործընթացում ամեն բան գնում է այնպես, ինչպես գնում էր մինչ այժմ։ «Ոչինչ չի փոխվել։ Ավելին, տեսանելի ապագայում որեւէ փոփոխության միտում չի էլ նկատվում»,-ամփոփեց Քաղաքական և միջազգային հետազոտությունների հայկական կենտրոնի փորձագետը։
Նշենք, որ թուրքական Haberler-ի փոխանցմամբ՝ Կարսի նահանգապետ Ահմեդ Քարան նշել է, թե իրենց մոտ Թուրքիայի ԱԳՆ-ից գրություն է եկել, որը նպատակ ունի պարզելու, թե Հայաստանի հետ ցամաքային հաղորդակցության ուղիները ինչ վիճակում են գտնվում, եւ դրանք կարգի բերելու համար որքան ժամանակ է հարկավոր։