Ադրբեջանը փորձում է ցանկալին որպես իրականություն ներկայացնել: Այս մասին հայտարարեց ռազմական փորձագետ Արկադի Գրիգորյանը՝ պատասխանելով NEWS.am-ի թղթակցի հարցին այն մասին, որ ադրբեջանական լրատվամիջոցները հաղորդում են «խելացի» ավիառումբերի արտադրության մասին:
«Նման հրապարակումները բազմաթիվ հարցեր են ծնում»,- նշեց փորձագետը: Նրա խոսքով, ամենայն հավանականությամբ, խոսքն ինքնակառավարվող ռումբերի մասին է, իսկ դրանք երկու տեսակ են լինում. լոկալ եւ գլոբալ ուղղորդման: Լոկալ ուղղորդման պարագայում ռումբն «աշխատում» է լազերային ցուցումով, որը լուսավորում է թիրախը: «Բայց այդ համակարգը բավական խնդրահարույց է: Մասնավորապես, հաջողությունը կախված է եղանակային պայմաններից, ընդ որում, ճշգրտությունն այնքան էլ մեծ չէ»,- նշեց փորձագետը: Բացի այդ, համակարգի ներդրումն Ադրբեջանի օդանավային պարկի արդիականացում կպահանջի: «Նման զանգվածային արդիականացման նախադեպեր պարզապես չկան»,- հավելեց Արկադի Գրիգորյանը:
Գլոբալ համակարգն ավելի արդյունավետ եւ շահեկան տարբերակ է: Սակայն Ադրբեջանի պարագայում այն ավելի մեծ խնդիրներ կառաջացնի: «Այս դեպքում արդեն ոչ թե արդիականացում, այլ ավիապարկի ամբողջական փոփոխություն է հարկավոր»,- նշեց Արկադի Գրիգորյանը: Հաշվի առնելով, որ Ռուսաստանն ու ԱՄՆ-ն ԵԱՀԿ Մինսկի խմբի համանախագահ են, Հայաստանի կամ Արցախի դեմ այդ համակարգերը գործածելու Ադրբեջանի հնարավոր հավանականությունը միանգամայն հետաքրքիր է:
Փորձագետի խոսքով, նման ավիառումբերի գործածումը հնարավոր է նաեւ անօդաչու սարքերի տեղական ցանցի ստեղծման օգնությամբ: «Սակայն դա շատ թանկ է եւ հասու չէ Ադրբեջանի գրպանին: Այնպես որ՝ նման «սենսացիաները» մամուլի համար են»,- ամփոփեց Արկադի Գրիգորյանը:
Ավելի վաղ ադրբեջանական լրատվամիջոցները, վկայակոչելով պաշտպանական արդյունաբերության նախարար Յավեր Ջամալովին, տեղեկացրել էր «խելացի» ավիառումբերի սերիական արտադրություն սկսելու մասին:
