ԵԱՀԿ Մինսկի խմբի համանախագահներն անում են ամեն ինչ՝ կանխելու հակամարտության էսկալացիան: Այդ մասին հայտարարել է ԵԱՀԿ Մինսկի խմբի ամերիկացի համանախագահ Ռոբերտ Բրադկեն:
Նշելով, որ հունիսին լրջորեն խախտվել է հրադադարի ռեժիմը՝ Բրադկեն մատնանշել է իրավիճակի լրջության վրա՝ այն վտանգավոր անվանելով: Բրադկեն նաեւ ասել է, թե հակամարտությունը սառեցված չէ: «Շփման գծում մարդիկ են զոհվում: Մենք պետք է գնանք խաղաղության տանող ճանապարհով: Ես վստահ եմ, որ երկու նախագահներն էլ խաղաղություն են ուզում: Նրանցից յուրաքանչյուրը գիտակցում է, թե ինչ ողբերգություն է տարածաշրջանի համար նոր պատերազմը: Անկախ արդյունքից՝ պատերազմը կհանգեցնի թշնամությանը, որը կձգվի տասնամյակներով»,- ասել է Բրադկեն:
Նրա խոսքով, միջնորդությունը մրցում չէ, ճանաչված դառնալու համար: «Մեր պարտքն է վերացնել խոչընդոտները, որ կան կողմերի միջեւ: Գլխավորը, որ կողմերը համաձայնության գան իրար հետ, այլ ոչ թե մեր»,- նշել է նա:
Բրադկեն նկատել է, թե նախագահները քաղաքական կամք ունեն հակամարտության լուծման համար:
«Գլխավոր խնդիրներից մեկը նախագահների հազվադեպ հանդիպումներն են։ Դա մեզ համար դժվար հարց է։ Նախագահներից մեկը մեզ ասում է, որ ինքը խաղաղություն է ուզում, իսկ մյուս կողմը դա չի ուզում, հետո այդ նույն բանը մենք լսում ենք հակառակ կողմից»,- հայտնել է Բրադկեն BBC-ի ադրբեջանական ծառայությանը տված հարցազրույցում:
«Նախագահներն իրար նման չեն: Նրան մոտեցումներն ու ոճերը տարբեր են: Բայց ես վստահ եմ, որ երկու նախագահն էլ հավատարիմ են հակամարտության խաղաղ կարգավորման հարցին»,- ասել է նա:
