Հայկական կողմը բարձրացրել է ՀՀ քաղաքացիների՝ 90 օրից ավելի Վրաստանի տարածքում գտնվելու հարցը, որի հետ կապված խնդիրներ են առաջացել: Այս տեղեկությունը NEWS.am-ի թղթակցի հետ զրույցում հաստատեցին Կառավարությունից:
Վրաստանի միգրացիոն քաղաքականության օրենսդրությունում կատարվել էին փոփոխություններ, ըստ որի՝ օտարերկրյա քաղաքացիների, այդ թվում՝ հայերի համար, այդ երկրում 90 օրից ավել մնալուց հետո կարող են խնդիրներ առաջանալ, տուգանքներ լինել: NEWS.am-ի տեղեկություններով՝ վրացական կողմի հետ բանակցությունների արդյունքում խոստացել են, որ մինչեւ 2015թ մարտ ամիսը այդ հարցը օրենսդրորեն կկարգավորվի:
Նշենք, որ «Ժողովուրդ» թերթը գրել է, որ Վրաստանում գործող վիզային ռեժիմը, որի արդյունքում ՀՀ քաղաքացիները 90 օրից ավել չեն կարող մնալ այդ երկրի տարածքում, կփոխվի: «Ժողովուրդի» տեղեկություններով, երբ դեկտեմբերի 11-ին ՀՀ վարչապետ Հովիկ Աբրահամյանն այցելել է Վրաստան, նրացահայ պատգամավորները նրան հորդորել են այս հարցը բարձրացնել վրաց գործընկերների հետ բանակցությունների ժամանակ: Ստեղծված իրավիճակի շուրջ ՀՀ վարչապետը զրուցել է Վրաստանի ղեկավարության հետ եւ նրանց փոխանցել վրացահայության մտահոգությունները, որոնց մի մասը ՀՀ քաղաքացի է: «Մեր տեղեկություններով՝ օրերս Վրաստանի կառավարությունից բարձրաստիճան մի պաշտոնյա զանգահարել է Վրաստանի խորհրդարանի պատգամավոր Սամվել Պետրոսյանին եւ խոստացել, որ առաջիկայում վիզային ռեժիմի կարգը փոփոխության կենթարկվի: Ինչպես հայտնի է, Վրաստանի եւ ՌԴ հարաբերությունների սրվելուց հետո հազարավոր վրացահայեր Ռուսաստան արտագնա աշխատանքի մեկնելու համար ՀՀ քաղաքացիություն են ստացել»,-գրել է թերթը: