News
Լրահոս
News
Չորեքշաբթի
Հուլիս 17
USD
476.74
EUR
535.47
RUB
7.6
ME-USD
0.16
Տեսնել լրահոսը

Ճապոնացի Արիհիկո Հասեգավան արդեն 5 տարի է՝ ապրում է Երեւանում: 2000 թ.-ին որպես զբոսաշրջիկ Հայաստան եկած Արիհիկոն զարմացել էր, թե ինչպես երկրում, որտեղ ընդամենը մի քանի ճապոնացի է ապրում, երիտասարդները մեծ հաճույքով սովորում են ճապոներեն:

«14 տարի առաջ Հայաստան եկա՝ որպես զբոսաշրջիկ, այդ ժամանակ շատ էի ճանապարհորդում: Այստեղ պատահաբար հանդիպեցի ուսանողների, որոնք ճապոներեն էին սովորում: Տպավորվեցի, որ այսքան շատ էին ուզում ճապոներեն սովորել: Վերադարձա Ճապոնիա ու այնտեղից էլ երկու տարի անց Լատինական Ամերիկա՝ դասավանդելու ճապոներեն: Մասնագիտությամբ իրավաբան եմ, բայց դասախոսի աշխատանքը շատ հավանեցի: 3 տարի Ամերիկայում աշխատելուց հետո նորից եկա Հայաստան՝ նորից որպես զբոսաշրջիկ»,- NEWS.am-ի թղթակցի հետ զրույցում վարժ հայերենով պատմեց Արիհիկոն:

Լատինական Ամերիկայից վերադառնալուց հետո ճապոնացին որոշեց տեղափոխվել Հայաստան ապրելու: Այստեղ արդեն նա դիմեց Երեւանի Վ.Բրյուսովի անվան լեզվահասարակագիտական համալսարան՝ ճապոներեն դասավանդելու համար:

«Երբ ութ տարի առաջ Հայաստան եկա, հանդիպեցի կնոջս՝ Լիլիթին, որը մեկ տարի էր, ինչ ճապոներեն էր սովորում, ընկերացանք, բայց ամուսնացել ենք 3 տարի առաջ»,- ավելացրեց նա:

Արիհիկոյի եւ Լիլիթի փոքրիկը 1 տարեկան է, ծնողների պնդմամբ՝ եւ հայերեն է լավ հասկանում, եւ ճապոներեն: Փոքրիկ Արենի առաջին գիտակցական Նոր տարին է, որը ինչպես նախորդ տարիներին նշել են հայկական ավանդույթներով, իսկ մեկ օր էլ տրամադրել մոճի պատարստելուն:

«Հայկական Ամանոր ենք նշում, բայց հունվարի 7-8-ին էլ ճապոնական մոճի ենք պատրաստում: Մեծ ամանի մեջ լցնում ենք բրնձի ալյուր, որը հատուկ գործիքով սկսում ենք ծեծել, այնուհետեւ դրանից արդեն բլիթներ ենք պատրաստում: Իսկ առհասարակ, Ճապոնիայում Ամանորը գիշերը նաեւ տոշի-կոշի սոբա ենք պատրաստում, դա ճապոնական լապշա է, որն ուտում են հենց կեսգիշերին, երկարակեցության նշան է: Սովորաբար, Ամանորի գիշերը ճապոնացիները գնում են տաճար ու աղոթում, որ տարին հաջող լինի: Կան մարդիկ, որոնք էլ բուդդայական տաճար են գնում, որտեղ յուրաքանչյուրը մեկ անգամ հարվածում է զանգին եւ այսպես 108 զանգ է հնչում: Մեզ մոտ կարծիք կա, որ մարդն ունի 108 վատ միտք, իսկ այդ զանգերով դու վանում ես այդ մտքերը»,- ճապոնական ավանդույթները ներկայացրեց Արիհիկոն:

Ճապոնիայում «Ձմեռ պապ» հասկացություն չկա, մարդիկ երեխաներին օտոշի դամա են տալիս՝ գումար: Այնուամենայնիվ, Արիհիկոյին դուր է եկել տոնածառի տակ նվերներ դնելու՝ հայերի սովորույթը եւ փոքրիկի համար նվեր է պատրաստել:

«Հայկական Ամանորը շատ եմ հավանում, բայց չեմ սիրում, երբ այդքան շատ են ուտում: Ուր գնում ես, ասում են՝ կեր, հայերենով ասում եմ՝ չեմ ուզում, բայց մեկ է՝ ստիպում են»,- ծիծաղելով ասաց նա:

Այս տարի Հայաստանում արդեն պաշտոնապես կբացվի Ճապոնիայի դեսպանատունը, Արիհիկոն մեծ հույս ունի, որ դրանից հետո հայերն ու ճապոնացիներն ավելի ակտիվ կհամագործակցեն:

«Հայաստանից գնալու մասին ընդհանրապես չեմ մտածում»,- վերջում ավելացրեց Արիհիկո Հասեգավան:

Աիդա Հովհաննիսյան

Լուսանկարները՝ Արսեն Սարգսյանի /NEWS.am

!
Այս նյութը հասանելի է նաև   English and Русский
Տպել
Կարդացեք նաև
Ամբողջը
Մի քանի ժամից Խոզի տարին իր իրավունքների մեջ կմտնի
Ըստ արեւելյան օրացույցի՝ Նոր տարին կսկսվի առաջիկա գիշերը Երեւանի ժամանակով 01.03-ին…
Ձմեռ պապի եւ Ձյունանուշի օր
Այդ օրերին սովորաբար հեքիաթներ ու լեգենդներ են պատմում նրանց մասին․․․
Կարո Փայլանը հայերենով շնորհավորել է Սուրբ Ծնունդը (ֆոտո)
Խաղաղ աշխարհ ունենալու երազանքով...
Հայաստանում նշում են Սուրբծննդյան ճրագալույցը (վիդեո)
Ըստ Գրիգոր Տաթեւացու՝ Սուրբ Պատարագ է մատուցվում երկու անգամ՝ հունվարի 5-ի երեկոյան՝ ճրագալույցի, եւ հունվարի 6-ի առավոտյան՝ տերունական...
Մոնակոյի իշխանուհին Լապլանդիայում այցելել է Սանտային
Նկարում պատկերված են Ժակը եւ Գաբրիելան, որոնց Սանտա Կլաուսը ինչ-որ թղթեր է ցույց տալիս, հավանաբար, նվերների ցանկը...
Իրանի նախագահ Ռոհանին շնորհավորել է իրանցի քրիստոնյաներին Նոր Տարվա առիթով
Իրանի նախագահ Հասան Ռոհանին իր ուղերձում շնորհավորել է Իրանի քրիստոնյա քաղաքացիներին Նոր 2019․․․