Հայաստանը պետք է ճանաչի Թուրքական Հանրապետությունը, նրա ամբողջականությունը 1920թ. Վուդրո Վիլսոնի արբիտրաժին եւ այդ ակտից բխող բոլոր որոշումների համապատասխան: Այդ մասին ասված է «Ժառանգություն» կուսակցության հուլիսի 10-ին կայացած համագումար բանաձեւում:
«Հայաստանը պետք է ճանաչի նաեւ Լեռնային Ղարաբաղի Հանրապետությունն իր սահմանադրական սահմանների շրջանակներում, նաեւ Ադբեջանի ամբողջականությունը, որն իր հերթին պետք է ճանաչի Արցախը, վերադարձնի Շահումյանը, Գետաշենը, Արծվաշենն ու Նախիջեւանը»,- ասված է փաստաթղթում:
Բանաձեւում ասված է նաեւ, որ Հայաստանը պետք է ճանաչի Վրաստանը որպես կարեւոր հարեւանի, որ իր հերթին պետք է գիտակցի, թե Ջավախքը երկու պետությունների անվտանգության հանգույցն է: Վրաստանը պետք է ապահովի նաեւ այդ երկրում հայկական համայնքի հիմնական ազատությունները: Հայաստանը պետք է լավ հարաբերություններ ունենա Իրանի, Ռուսաստանի, Չինաստանի, Եվրամիության եւ ԱՄՆ-ի հետ՝ ակնկալելով նրանց պատասխան հարգանքը:
«Հայաստանը պետք է դառնա իրապես ժողովրդավար եւ ինքնքիշխան երկիր, որտեղ տիրում է օրենքի գերակայությունը, անցկացվում են արդար ընտրություններ, իսկ իշխանության ներկայացուցիչները, ովքեր իրենց ունեցվածքը, ձեռնարկությունները դիզել են մարդկային կյանքերի գնով, պաշտոնական լիազորությունների չարաշահմամբ, պետք է օրենքի առջեւ պատասխան տան օրենքի ամբողջ խստությամբ»,- ասված է հայտարարության մեջ: