Հունվարի 2-ից Հայաստանը դարձավ Եվրասիական տնտեսական միության (ԵՏՄ) լիիրավ անդամ՝ Ռուսաստանի, Բելառուսի եւ Ղազախստանի հետ միասին: Կազմակերպության գործադիր մարմիններում, սակայն, Հայաստանն առայժմ ներկայացված կլինի սահմանափակ կազմով՝ մինչեւ ներկայիս կազմերի իրավասությունների ժամկետի լրանալը:
Մինչեւ 2015թ. վերջը Եվրասիական տնտեսական հանձնաժողովում Հայաստանը ներկայացված կլինի երեք անդամով՝ մեկ ձայնով:
Ծառայությունների ոլորտում Հայաստանը ԵՏՄ համաձայնագրերին կմիանա ընդհանուր հիմունքներով, իսկ առեւտրի ոլորտում նախատեսված է աստիճանական (մինչեւ 2022թ.) անցում ԵՏՄ միասնական մաքսային սակագնին:
Մինչեւ 2022թ. Հայաստանը կարող է կիրառել ԵՏՄ մաքսատուրքերից տարբերվող մաքսատուրքեր մի շարք ապրանքների, այդ թվում՝ մսի եւ մսամթերքի նկատմամբ: Մինչեւ 2020թ. հանրապետության համար կգործին առանձին սակագին որոշ տեսակի կաթնամթերքի, ձվի, մեղրի, մինչեւ 2019թ.՝ մրգի որոշ տեսակների եւ ընկույզի համար:
Բացի դրանից, մինչեւ 2018թ. Հայաստանը զրոյական մաքսատուրքեր կկիրառի բենզինի նկատմամբ, իսկ միասնական մաքսային սակագնի կանցնի 2020թ.: Նույն սկզբունքով կկարգավորվեն օրգանական եւ ոչ օրգանական քիմիայի արտադրանքի որոշ տեսակների, դեղագործական արտադրանքի, պարարտանյութի, ներկերի, կենցաղային քիմիայի, կաշվե, պլաստիկե եւ ռետինե իրերի մաքասատուրքերը:
Մինչեւ 2021թ. Հայաստանում կգործեն առանձին մաքսատուրքեր գործվածքեղենի որոշ տեսակների համար, հաղորդում է ТАСС-ը:
ԵՏՄ անդամակցության կապակցությամբ Հայաստանը կսկսի բանակցությունները ԱՀԿ-ի հետ՝ կազմակերպության շրջանակում իր պարտավորությունների փոփոխման վերաբերյալ:
