NEWS.am-ին հայտնի են դարձել հունվարի 11-ի լույս 12-ի գիշերը դաժանաբար սպանված գյումրեցի ընտանիքի անդամների անունները:
Ամուսիններ Սերյոժա եւ Հասմիկ Ավետիսյանները, նրանց որդին Արմեն Ավետիսյանը եւ նրա կինը՝ Արաքսյա Ավետիսյանը, նրանց դուստրը՝ Հասմիկը, որին հանցագործը սպանել է հենց օրորոցում, նաեւ՝ Սերյոժայի եւ Հասմիկի չամուսնացած դուստրը՝ Աիդա Ավետիսյանը: 6 ամսական Սերյոժան ծանր վիճակում տեղափոխվել է հիվանդանոց:
Մեր տեղեկություններով մարմիններն առավոտյան հայտնաբերել է տանտիրուհու քույրը, որը բնակվում է հարեւանությամբ եւ առավոտյան սովորույթի համաձայն քրոջ տուն է գնացել՝ սուրճ խմելու:
Նշենք, որ Ավետիսյանների ընտանիքը իր ապրուստը վաստակում էր հոր եւ որդու արտագնա աշխատանքով: Նրանք Ռուսաստանից վերադարձել էին Ամանորից առաջ: Զինվորականների հետ նրանց կապը դեռեւս հայտնի չէ:
Ավելի վաղ NEWS.am-ը գրել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության հիմնական կասկածյալը ռուս զինվորական Պերմյակով Վալերի Պավլովիչն է, որին այժմ որոնում են։