Գյումրիում 7 հոգանոց ընտանիքի 6 անդամների սպանության վայրից այսօր՝ հունվարի 12-ին, հայտնաբերվել է կասկածյալի զինվորական համազգեստը, մեկ ինքնաձիգ, մեկ սվին-դանակ, 21 կրակված պարկուճ եւ երկու փամփշտակալ՝ մեկը լրիվ լիցքավորված, մյուսը՝ դատարկ: Այս մասին այսօր՝ հունվարի 12-ին, լրագրողների հետ զրույցում ասաց ՀՀ ոստիկանության պետի առաջին տեղակալ Հունան Պողոսյանը՝ նշելով, որ չի բացառվում՝ կասկածյալը քաղաքացիական հագուստով է եւ անզեն։
«Մենք տեղեկություն չունենք, որ նրա մոտ զենք կա: Ամենայն հավանականությամբ՝ չկա, քանի որ նա իր զինվորական պարագաները թողել է դեպքի վայրում եւ դիմել փախուստի: Մեր քաղաքացիները պետք է խուճապի չմատնվեն, բայց պետք է զգոն լինեն: Նախնական տվյալներով՝ նրա մոտ նաեւ գումար չկա, եթե, իհարկե, բնակարանից ոչինչ չի հափշտակել»,- ասաց Հունան Պողոսյանը՝ նշելով, որ ոստիկանությունը համագործակցում է ռուսական 102-րդ ռազմաբազայի հրամանատարության հետ:
Հունան Պողոսյանը նաեւ նշեց, որ ընտանիքի բոլոր անդամների դիերը անկողնում են հայտնաբերվել:
Հունան Պողոսյանը նաեւ նշեց, որ զինվորականի եւ ընտանիքի միջեւ կապի մասին այս պահին որեւէ հստակ տեղեկություն չկա, միայն ենթադրություններ են:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների 7 հոգանոց ընտանիքի 6 անդամներին։ Սպանվածներից հինգը չափահաս են եղել, մեկը՝ մանկահասակ երեխա: Վեց ամսական մյուս երեխան տեղափոխվել է հիվանդանոց, որտեղ վիրահատվել է եւ այժմ ծանր վիճակում գտնվում է վերակենդանացման բաժանմունքում։ Սպանության հիմնական կասկածյալը ռուս զինվորական Վալերի Պավելի Պերմյակովն է: Ոստիկանությունը որոնում է նրան:
