Ռուսաստանին մեկուսացնելու փորձերն անհեռանկարային են: Լատվիայի ԱԳ նախարար Էդգարս Ռինկեւիչսի հետ բանակցություններից հետո կայացած ասուլիսում այս մասին հայտարարել է ՌԴ ԱԳ նախարար Սերգեյ Լավրովը: «Մենք գործընկերներ ունենք»,- ընդգծել է ռուսաստանցի նախարարը:
«Մենք շահագրգռված ենք ԵՄ-ի հետ լիարժեք համագործակցությամբ՝ բացառապես գործընկերային, իրավահավասար, փոխշահավետ հիմքի վրա,- հայտարարել է Լավրովը:- Դրա հնարավորությունները կան: Դրա համար անհրաժեշտ է հետեւողական գործել, հրաժարվել երկակի ստանդարտներից՝ ներառյալ իրավապաշտպան, մարդասիրական ասպեկտները»:
Ըստ ՏԱՍՍ գործակալության, Լավրովը նաեւ հայտարարել է, որ Ռուսաստանը մտադիր չէ Եվրամիության հետ քննարկել պատժամիջոցները վերացնելու պայմանները:
«Մենք պատժամիջոցներ չենք կիրառել: Մենք բազմիցս ասել ենք, որ մեզ ակնարկում են, իբր, եկեք համաձայնեցնենք չափանիշները, դուք դրանք իրականացրեք, այդ ժամանակ էլ մենք կվերացնենք պատժամիջոցները: Մենք ոչինչ չենք քննարկելու»:
Նախարարն ընդգծել է, որ այդ «ապակառուցողական միջոցառումներից» բոլորն են տուժում, այդ թվում՝ Ռուսաստանը, բայց եւ վստահություն է հայտնել, որ երկիրն այդ իրավիճակից «պլյուսով» դուրս կգա:
Լավրովի խոսքով, եվրոպական գործընկերները, «որոնք իրենց վրա զգում են պատժամիջոցների բացասական ազդեցությունը, պետք է սեփական եզրահանգումն անեն»: «Դա նրանց խնդիրն է, այլ ոչ թե մերը»,- եզրափակել է ՌԴ ԱԳ նախարարը:
