Գյումրիում 7 հոգանոց ընտանիքի 6 անդամներին հունվարի 12-ին դաժանաբար սպանելու մեջ կասկածվող եւ ոստիկանության կողմից հետախուզվող ռուս զինծառայող Վալերի Պավելի Պերմյակովի ծառայակից ընկերները նրա մոտ ագրեսիա չեն նկատել, անհավասարակշիռ պահվածք նույնպես։
Պերմյակովի ընկերը՝ Անդրեյը, NEWS.am-հետ զրույցում ասաց, որ դժվարանում է հավատալ, որ Պերմյակովը կարող էր նման ոճրագործություն կատարել.«Ես շոկի մեջ եմ, անկեղծ ասած, չեմ հավատում, որ նա նման բան կաներ, մարդ կսպաներ»։
Նրա խոսքով՝ իրենք ծանոթացել են Ռուսաստանում զինվորական ծառայության ժամանակ։ Ծառայակից ընկերը նրա պահվածքում արտառոց բան չի նկատել։
«Շփովող էր , շատ ընկերներ ուներ, բայց բնույթով հանգիստ էր, կռիվներ չէր սարքում»,- պատմեց նա:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների 7 հոգանոց ընտանիքի 6 անդամներին։ Սպանվածներից հինգը չափահաս են եղել, մեկը՝ մանկահասակ երեխա: Վեց ամսական մյուս երեխան տեղափոխվել է հիվանդանոց, որտեղ վիրահատվել է եւ այժմ ծանր վիճակում գտնվում է վերակենդանացման բաժանմունքում։ Սպանության հիմնական կասկածյալը ռուս զինվորական Վալերի Պավելի Պերմյակովն է: Ոստիկանությունը որոնում է նրան:
