Գյումրիում հունվարի 12-ի գիշերը դաժանորեն սպանված Ավետիսյանների վեցհոգանց ընտանիքի անդամների հոգեհանգստի արարողությունը կկայանա վաղը՝ հունվարի 14-ին: Այս մասին NEWS.am-ի թղթակցի հետ զրույցում ասաց Ժուռնալիստների «Ասպարեզ» ակումբի խորհրդի նախագահ Լեւոն Բարսեղյանը:
Նա նշեց, որ դիերը չեն տվել, որոշվել է, որ կդրվեն եկեղեցում: Նախնական տեղեկություններով՝ հոգեհանգիստը կկայանա Գյումրիի Անի թաղամասի եկեղեցում: Ինչ վերաբերում է հուղարկավորությանը, ապա հնարավոր է այն կայանա վաղը կամ մյուս օրը, դեռ հստակեցվում է:
Ավելի վաղ NEWS.am-ը գրել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության հիմնական կասկածյալը ռուս զինվորական Վալերի Պավելի Պերմյակովն է: Նրան հայտնաբերել են հայ-թուրքական սահմանի մոտ: