Գյումրիում հարյուրավոր քաղաքացիների մասնակցությամբ այսօր՝ հունվարի 14-ին, ժամը 15:00-ին մեկնարկեց գյումրեցին ընտանիքի 6 անդամներին սպանելու մեջ կասկածվող Վալերի Պերմյակովին հայկական կողմին հանձնելու պահանջով մեծ ավտոերթը:
NEWS.am-ի թղթակիցը հաղորդում է, որ ավտոերթին մասնակցելու համար Երեւանից Գյումրի են գնացել մեծ թվով քաղաքացիական ակտիվիստներ, այդ թվում՝ Հիմնադիր խորհրդարանից:
«Էդ ստահակին, որին հովանավոր կանգնեց ռազմաբազան, պահանջում ենք հանձնել հայկական կողմին: Ինքը պետք է իր պատիժը կրի այստեղ, մենք պետք նրա դատաստանը տեսնենք: Գյումրին գյումրեցիներինն է, Հայաստանը՝ հայերինը, մենք թույլ չենք տա, որ ինչ-որ մեկը մեզ ղեկավարի»,- NEWS.am-ի հետ զրույցում ասաց Հիմնադիր խորհրդարանի անդամ Վարդան Հակոբյանը:
Իրենց ճանապարհին ավտոերթի մասնակիցները խանութներից մեկի առջեւ դրված ռուսական դրոշը հանեցին ու գցեցին գետնին:
Ավտոերթի մասնակիցները հարյուրավոր մեքենաներով այս պահին Գյումրիի 8-րդ զինվորական թաղամասից շարժվում են դեպի Գյումրիում ՌԴ գլխավոր հյուպատոսարան: Մեր թղթակիցը հաղորդում է, որ Գյումրիում մեծ թվով ոստիկանական ուժեր են կենտրոնացված, ոստիկանական ստորաբաժանումներ են ժամանել նաեւ մայրաքաղաքից:
Հիշեցնենք, որ Ավետիսյանների քաղաքացիական հոգեհանգիստը նախատեսված է այսօր՝ հունվարի 14-ին՝ ժամը 17:00-ին, հուղարկավորությունը՝ հունվարի 15-ին՝ ժամը 14:00-ին։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության հիմնական կասկածյալը ռուս զինվորական Վալերի Պավելի Պերմյակովն է: Նրան հայտնաբերել են հայ-թուրքական սահմանի մոտ: Որոշվել է, որ Պերմյակովի գործը կքննի ռուսական կողմը:
