Տեսանյութը՝ Ազատություն ռադիոկայանի ուղիղ եթերից
Գյումրեցի ընտանիքի 6 անդամներին սպանելու մեջ կասկածվող Վալերի Պերմյակովին հայկական կողմին հանձնելու պահանջով այսօր՝ հունվարի 14-ին Գյումրիում ավտոերթի մասնակիցները Գյումրիում ՌԴ հյուպատոսարանից շարժվեցին դեպի մարզպետարան, որտեղ վիճաբանություն եւ քաշքշուկ տեղի ունեցավ ակցիայի մասնակիցների եւ ոստիկանների միջեւ:
Գյումրիում NEWS.am-ի թղթակիցը հաղորդում է, որ ոստիկանները փակել էին մարզպետարանի մուտքը՝ ակտիվիստներին թույլ չտալով մոտենալ շենքին եւ պատուհանին փակցնել իրենց պաստառները, որոնցից մեկի վրա գրված էր «Кошкин дом в Армении»:
Երթի մասնակիցները փորձում էին պաստառները փակցնել, սակայն ոստիկանները պոկում էին դրանք:
Մինչեւ այդ վիճաբանեցին ակցիայի մասնակիցներից Արթուր Ստեփանյանը եւ Շիրակի ոստիկանապետ Վարդան Նադարյանը: Քաղաքացին ոստիկանապետին մեղադրում էր, որ վերջինը տեսել է, թե ինչպես է ոստիկանը հարվածում իրեն եւ չի միջամտել, սակայն ոստիկանապետը պնդում էր, որ ինքը ոչինչ չի տեսել:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության հիմնական կասկածյալը ռուս զինվորական Վալերի Պավելի Պերմյակովն է: Նրան հայտնաբերել են հայ-թուրքական սահմանի մոտ: Որոշվել է, որ Պերմյակովի գործը կքննի ռուսական կողմը: