Գյումրիում Ավետիսյանների ընտանիքի սպանության դատաքննությունը Հայաստանն ու Ռուսաստանը պետք է միասին վարեն՝ Հայաստանի տարածքում: Այս մասին այսօր՝ հունվարի 15-ին, կառավարության նիստից հետո լրագրողների հետ զրույցում նշել է Հայաստանի ԱԳ փոխնախարար Շավարշ Քոչարյանը:
Նա նշել է, որ ՀՀ-ում ռուսական ռազմակայանի տեղակայման մասին համաձայնագրի համաձայն, եթե ռազմակայանի անձնակազմի անդամը հանցագործություն է կատարել ռազմակայանի սահմաններից դուրս, նա ՀՀ իրավազորության ներքո է: Այլ հարց է, եթե հանցագործությունը ռազմական բնույթի է (դասալքություն կամ առանց թույլտվության զենքի կրում զորամասի տարածքից դուրս): Այդ դեպքերում հետաքննությունը վարում է ռուսական կողմը:
«Քանի որ այս դեպքում երկու հանցագործություններն էլ տեղի են ունեցել, երկու երկրների իրավապահ մարմինները պետք է աշխատեն մինչեւ վերջ համագործակցելով: Կարող եմ ասել, իհարկե, որ դատաքննությունը պետք է տեղի ունենա Հայաստանում»,-հավելել է Քոչարյանը:
Ավելի վաղ NEWS.am-ը գրել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության մեջ մեղադրվում է ռուս զինվորական Վալերի Պավելի Պերմյակովը: Նրան հայտնաբերել են հայ-թուրքական սահմանի մոտ:
Հայաստանի գլխավոր դատախազությունը տարածել է հաղորդագրություն, որ ՀՀ եւ ՌԴ գլխավոր դատախազությունները քննարկել են Գյումրիում նախօրեին տեղի ունեցած սպանության գործի մանրամասները: «Երկուստեք ընդգծվել է, որ տեղի ունեցած ողբերգության բոլոր մեղավորները պետք է պատժվեն օրենքի ողջ խստությամբ: Հանցագործության կատարման մեջ կասկածվող Վալերի Պավելի Պերմյակովը ՌԴ քաղաքացի է, եւ գտնվում է ՌԴ իրավապահների հսկողության՝ նույնն է՝ ՌԴ իրավազորության ներքո: Հետեւաբար Վ. Պերմյակովին ՀՀ իրավապահներին հանձնելու հարց չի քննարկվում, նկատի ունենալով ՌԴ սահմանադրության 61-րդ հոդվածի 1-ին կետում ամրագրված արգելքը՝ համաձայն որի, ՌԴ քաղաքացին չի կարող հանձնվել այլ պետության»,-ասված է հաղորդագրության մեջ: