Երեւանում ԱՄՆ դեսպանատան աշխատակազմը իր ցավակցություն է հայտնել Գյումրիում գազանաբար սպանված Ավետիսյանների ընտանիքի հարազատներին:
«Այսօր, երբ Գյումրիում հողին են հանձնում Ավետիսյանների աճյունները, ԱՄՆ դեսպանության աշխատակազմը իր խորին ցավակցությունն է հղում Ավետիսյանների ընտանիքի անդամներին, հարազատներին եւ մտերիմներին»,-ասված է դեսպանատան տարածած հայտարարության մեջ:
Ավելի վաղ NEWS.am-ը գրել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության մեջ մեղադրվում է ռուս զինվորական Վալերի Պավելի Պերմյակովը: Նրան հայտնաբերել են հայ-թուրքական սահմանի մոտ: Գործը կքննի ռուսական կողմը, մեղադրյալը նրանց մոտ է եւ հայկական կողմին փոխանցելու հարց չի քննարկվում: