Քննչական կոմիտեի նախագահի տեղակալ Վահագն Հարությունյանը եւ ՀԿԳ քննիչը արդեն մի քանի ժամ է՝ գտնվում են Գյումրիում տեղակայված ռուսական ռազմաբազայում: Այս մասին հայտնեցին NEWS.am-ի աղբյուրները: Մեր տեղեկություններով՝ նրանք Գյումրիում ընտանիքի սպանության մեջ կասկածվող Վալերի Պերմյակովի հետ քննչական գործողություններ են իրականացնում: ՔԿ ներկայացուցիչները հարցաքննում են նրան, այսօր նախատեսված է նաեւ Պերմյակովին մեղադրանք առաջադրել:

Իսկ Շիրակի մարզի դատախազությունում էլ այս պահին գլխավոր դատախազ Գեւորգ Կոստանյանը հրավիրել է խորհրդակցություն: Ժամը 17.00-ին դատախազության դիմաց կկայանա գյումրեցիների բողոքի ակցիան, Գեւորգ Կոստանյանը կընդունի նրանց եւ պարզաբանումներ կներկայացնի:

Ավելի վաղ NEWS.am-ը գրել էր, որ հունվարի 12-ին Գյումրիի Մյասնիկյան փողոցի տներից մեկում ընտանիքի 6 անդամներին գտել են սպանված: Նրանց վրա հրազենային վնասվածքներ են եղել: Սպանվածներից հինգը չափահաս են եղել, մեկը՝ մանկահասակ երեխա: Սպանության մեջ մեղադրվում է ռուս զինվորական Վալերի Պավելի Պերմյակովը: Նրան հայտնաբերել են հայ-թուրքական սահմանի մոտ: