Գյումրիում հունվարի 12-ին Ավետիսյանների ընտանիքի սպանության մեջ մեղադրվող Վալերի Պերմյակովին Հայաստանում դատելու եւ պատժելու պահանջով այսօր՝ հունվարի 15-ին, Հայաստանում ՌԴ դեսպանատան մոտ ընթացող ակցիայի ժամանակ քաղաքացիական ակտիվիստ Վարդգես Գասպարին պառկեց գետնին, երբ նրան թույլ չտվեցին կանգնել դեսպանատան դիմացի անցումին։ (ֆոտոռեպորտաժ)

NEWS.am-ի թղթակիցը հաղորդում է, որ Վարդգես Գասպարին Ավետիսյանների ընտանիքի միակ ողջ մնացած վեց ամսական երեխայի նկարը ձեռքին սկզբում մի քանի րոպե կանգնեց դեսպանատան առջեւ՝ անցումի վրա, ոստիկանները նրան հորդորում էին հեռանալ այդտեղից՝ բացատրելով, որ Գասպարին այդպիսով խոչընդոտում է այլոց տեղաշարժը։

Գասպարին չհեռացավ, ավելին՝ պառկեց անցումի վրա, ինչից հետո ոստիկանները նրա ձեռքերից եւ ոտքերից բռնած տեղափոխեցին մայթ։

Իրավիճակը դեսպանատան առջեւ  շարունակում է մնալ լարված, քաղաքացիների եւ ոստիկանների միջեւ պարբերաբար բախումներ են լինում։ Ոստիկանները շրջափակել են դեսպանատունը։ Դեսպանատանը հարակից մայթերին ակցիայի մասնակիցներ կան, որոնք չեն կարողանում մոտենալ դեսպանատանը։

Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին: Կասկածյալը՝ ռուս զինվորական Վալերի Պավելի Պերմյակովը ձերբակալվեց նույն օրը կեսգիշերին ռուս սահմանապահների կողմից եւ հանձնվեց ռուսական ռազմաբազայի հրամանատարությանը: Ռուսական եւ հայկական կողմի միջեւ ձեռք բերված համաձայնությամբ գործը կքննի ռուսական կողմը:

Լուսանկարները՝ Արսեն Սարգսյանի/NEWS.am