Ֆրանսիայի Հայ դատի հանձնախումբը բողոքի նամակ է ուղարկել երկրի ԱԳ նախարար Լորան Ֆաբիուսին՝ կապված ԱՄՆ-ում Ֆրանսիայի դեսպան Ժերար Արոյի՝ ամերիկյան «NBC» հեռուստաալիքի եթերում Հայոց ցեղասպանության մասին արած հայտարարության: Այս մասին գրում է «Nouvelles d'Arménie» պարբերականը:
Պատասխանելով հարցին, ինչո՞ւ է Ֆրանսիան հակաիսլամական ծաղրանկարների հետ կապված սադրանք թույլ տալիս, մինչդեռ Ֆրանսիայում օրենքներն արգելում են ժխտել Հոլոքոստն ու Հայոց ցեղասպանությունը, ԱՄՆ-ում Ֆրանսիայի դեսպանն ասել է. «Իրականում Հայոց ցեղասպանության ժխտման մասին որեւէ օրենք չկա: Միայն մեկ օրենք կա Հոլոքոստի հերքման մասին, քանի որ դա կարծիք չէ: Հոլոքոստ իսկապես եղել է: Այնպես որ՝ դուք կարծիք չեք հայտնում, երբ ասում եք, որ Հոլոքոստ չի եղել, քանի որ դա փաստ է: Բայց, բացի Հոլոքոստից, ամեն ինչ թույլատրված է»:
Հայ դատի հանձնախմբի նամակում նշվում է, որ Ֆրանսիայի ներկայացուցչի անշնորհք հայտարարությունը հակասում է երկրի պաշտոնական դիրքորոշմանը, որն օրենքի մակարդակով ճանաչել է Հայոց ցեղասպանության փաստը: Նամակի հեղինակները ԱԳ նախարարին խնդրում են արձագանքել այդ հայտարարությանը: Միաժամանակ, Ամերիկայի Հայ Դատի հանձնախումբը կոչ է արել բողոքի ակցիա անցկացնել Վաշինգտոնում Ֆրանսիայի դեսպանության առջեւ:
