Գյումրիում անվտանգության ուժեղացված միջոցառումներ են ձեռնարկվում: NEWS.am-ի թղթակիցը հաղորդում է, որ ոստիկանական ստորաբաժանումներ են տեղակայվել Գյումրիում ՌԴ հյուպատոսարանի շենքի առջեւ եւ ռուսական 102-րդ ռազմաբազայի մոտ: Այս պահի դրությամբ, սակայն, որեւէ հայտարարությունը նախատեսվող բողոքի ակցիաների մասին չի արվել:
Հիշեցնենք, որ Գյումրիում է ՀՀ ոստիկանապետ Վլադիմիր Գասպարյանն իր տեղակալների հետ, որոնք խորհրդակցություն են անցկացնում մարզային ոստիկանությունում։
Ավելի վաղ հաղորդել էինք, որ այսօր՝ ժամը 17:02-ին, մահացել է 6-ամսական Սերյոժան մոտ, որը Գյումրիում սպանված ընտանիքի միակ փրկված անդամն էր:
Հիշեցնենք, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված էին գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել հիվանդանոց: Բժիշկները 7 օր պայքարոմ էին նրա կյանքի համար, որի ընթացքում նա երկու անգամ վիրահատության ենթարկվեց:
Մեղադրյալը՝ ռուս զինվորական Վալերի Պավելի Պերմյակովը ձերբակալվել է նույն օրը կեսգիշերին մոտ, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել են եւ մեղադրանք են առաջադրել Ռուսաստանի Դաշնության Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
ՀՀ գլխավոր դատախազության մեկնաբանմամբ, նա գտնվում է ՌԴ իրավազորության ներքո եւ դատվելու է ռուսական օրենսդրությամբ: Այս որոշումը հանրային բողոքի լայն ալիք է բարձրացրել, վերջին օրերին բողոքի ակցիաներ եւ մոմավառություններ են եղել Երեւանում, Գյումրիում, այլ քաղաքներում:
