Մի քանի տասնյակ քաղաքացիներ այսօր՝ հունվարի 19-ին, մոմավառություն են անցկացրել Երեւանի Ազատության հրապարակում՝ Օպերայի աստիճաններին տեղադրելով վառվող մոմեր, ծաղիկներ եւ խաղալիքներ՝ ի հիշատակ այսօր մահացած՝ Ավետիսյանների ընտանիքի 7-րդ անդամի՝ 6 ամսական Սերյոժային։ (ֆոտոռեպորտաժ)

Ոստիկանները, որոնք սկզբում թույլ չէին տալիս մոմերն աստիճաններին տեղադրել՝ պատճառաբանելով, որ դա հասարակական տարածքի ոչ նպատակային օգտագործում է, քաղաքացիների հետ վիճաբանությունից եւ քննարկումներից հետո ի վերջո թույլ տվեցին մոմերը տեղադրել աստիճաններին։

«Մենք ուղղակի չէինք կարող նստել տանը։ Բոլորս եկանք Ազատության հրապարակ՝ որպես հավաքատեղի մոմ վառելու եւ սգալու համար։ Սա այն եզակի դեպքերից է, երբ մի ամբողջ հայ ազգ միահամուռ աղոթում էր, որ այդ երեխան առողջանա։ Բոլորս շոկի մեջ ենք,- NEWS.am-ի թղթակցի հետ զրույցում ասաց Դանիել Իոանիսյանը։

 Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:

Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:

ՀՀ գլխավոր դատախազության մեկնաբանմամբ, նա գտնվում է  ՌԴ իրավազորության ներքո եւ դատվելու է ռուսական օրենսդրությամբ: Այս որոշումը հանրային բողոքի լայն ալիք է բարձրացրել, վերջին օրերին բողոքի ակցիաներ եւ մոմավառություններ են եղել Երեւանում, Գյումրիում, այլ քաղաքներում:

Լուսանկարները՝  Արսեն  Սարգսյանի/NEWS.am