Հայկական կողմը տարբեր մակարդակներով բազմիցս հայտարարել է, որ կողմնակից է Ղարաբաղյան հարցը բացառապես խաղաղ ճանապարհով կարգավորելուն եւ հարցի լուծումը ռազմական ճանապարհով համարում է անարդյունավետ: Այս մասին NEWS.am-ի թղթակցի հետ զրույցում ասաց ռազմական փորձագետ Արկադի Գրիգորյանը՝ մեկնաբանելով ադրբեջանական կողմի հնչեցրած սպառնալիքները:
Համաձայն ադրբեջանական ԶԼՄ-ների՝ նախարարը զորամաս կատարած այցելության ժամանակ հրամանատարական կազմին հորդորել է «արդարացնել երկրի ղեկավարության վստահությունը եւ մշտապես բարձրացնել մարտական պատրաստականությունը՝ ազատագրելու օկուպացիոն տարածքները»:
«Հայաստանն իսկապես պատերազմ չի ուզում, սակայն պատերազմն այս կամ այն ձեւով չի ավարտվել՝ դիպուկարների պատերազմ, դիվերսիոն հարձակումներ: Այժմ Ադրբեջանը սկսել է նոր փուլ՝ պատերազմ ընդդեմ խաղաղ բնակչության»,- նշեց Արկադի Գրիգորյանը՝ հավելելով, որ հունվարից առ այսօր հայկական կողմից վիրավորվել է 2 եւ զոհվել 1 խաղաղ բնակիչ:
«Հարեւան երկրի ղեկավարությունն իր հայտարարություններում փորձում է խեղաթյուրել փաստերը՝ ի շահ իր հետաքրքրությունների: Սակայն Ադրբեջանը ոչ մի բարոյական իրավունք չունի՝ մեղադրելու հայկական կողմին՝ հաշվի առնելով, որ հենց Բաքվի ջանքերով են երկու կողմերից զինծառայողներ եւ խաղաղ բնակիչներ զոհվում»,- ընդգծեց ռազմական փորձագետը:
Արկադի Գրիգորյանը նշեց, որ Ադրբեջանի գործողություններն են ստիպում Հայաստանին եւ Լեռնային Ղարաբաղին դիմել կանխիչ եւ պատժիչ մեթոդների: «Սակայն այս դեպքում էլ հայկական կողմի գործողությունները չի կարելի համեմատել հակառակորդի պահվածքի հետ: Ինչպես բազմիցս հայտարարել են իրավասու մարմինները, մենք չենք պատերազմում խաղաղ բնակչության դեմ եւ ոչ էլ նույնիսկ այն զինծառայողների դեմ, որոնք պարզապես կատարում են իրենց ղեկավարների հրամանները»,- հիշեցրեց Արկադի Գրիգորյանը՝ ավելացնելով, որ իր տեղեկություններով՝ շատ արդբեջանցի զինծառայողներ չեն ցանկանում պատերազմել:
Անդրադառնալով Ադրբեջանի պաշտպանության նախարարության ներկայացուցչի հայտարարությանը, թե «պատերազմի ավարտի միակ միջոցը ադրբեջանական տարածքների ազատագրումն է եւ հայկական օկուպացիոն ուժերի անհապաղ դուրսհանումը մեր հողերից», Արկադի Գրիգորյանը նշեց, որ այս հայտարարությունը վկայությունն է Ադրբեջանի՝ Հայաստանի եւ Լեռնային Ղարաբաղի նկատմամբ ունեցած ագրեսիայի:
«Չնայած կորուստներին՝ Բաքուն համառորեն չի ցանկանում ազատվել հարցը խաղաղ ռազմական ճանապարհով լուծելու որոշումից: Իսկ հայտարարությունն էլ ուղղակիորեն մատնանշում է, թե ով է ագրեսորը, որը չի ցանկանում դադարեցնել պատերազմը եւ լուծել կոնֆլիկտը խաղաղ ճանապարհով, եւ ով է ստիպված պաշտպանվել»,- ասաց ռազմական փորձագետը:
