Պաշտոնական տվյալներով, հունվարին մթերային գնաճը մեր երկրում կազմել է տարեկան կտրվածքով «ընդամենը» 5.4%: Զարգացած երկրների ցուցանիշների համեմատ, դա բարձր մակարդակ է: Եվրամիության երկրներում, օրինակ, ընդհանուր գնաճը վաղուց փոխարինվել է սղաճով (մեկ տարվա ընթացքում 0.61%՝ «մինուս» նշանով), ինչը նույնպես խնդիրներ է առաջացրել զարգացած տնտեսության համար:
Իսկ մեր հյուսիսային հարեւան Ռուսաստանում գնաճն անցել է «քառատրոփ» փուլ՝ վաղուց անցնելով երկնիշ շեմը: Հատկապես կտրուկ թանկացել է սննդամթերքը: Պաշտոնական տվյալներով, հունվարին մթերային գնաճը կազմել է տարեկան կտրվածքով 20.7% (!):
Մեր մայրաքաղաքում հունվարին սննդամթերքի մանրածախ գների ամենամեծ աճն արձանագրել է… հնդկաձավարը. տարեկան կտրվածքով 32.6%: Հայտնի է, որ Ռուսաստանում նույնպես տարածված այդ մթերքը զգալիորեն թանկացել է, որոշ շրջաններում՝ մինչեւ 2.5 անգամ:
Կարեւորագույն մթերքը՝ հացը, Երեւանում մեկ տարվա ընթացքում թանկացել է 7.2%-ով: Բացառությամբ տավարի մսի, այլ մսեղենի ու մսամթերքի գները նույնպես աճել են. խոզի միսը՝ 30.5%, հավը՝ 10.9%, երշիկեղենը՝ 9.9%-ից մինչեւ 13.8% եւ այլն: Շաքարավազը մեկ տարվա ընթացքում թանկացել է 9.9%-ով: Կաթնամթերքի մեծ մասը (որքան էլ զարմանալի է՝ բացառությամբ թարմ կաթի) թանկացել է երկնիշ թվով:
Ալկոհոլային մի շարք խմիչքների մասով հակառակ գործընթացն է: Հայրենական կոնյակի, ներմուծվող օղու եւ տեղական խաղողի գինու որոշ տեսակների գները մի քանի տոկոսով նվազել են: Նշենք, որ նույն Ռուսաստանում վերջերս՝ փետրվարի 1-ից, օղու մանրածախ նվազագույն գինն իջել է. 0.5 լիտրը՝ 220-ից 185 ռուբլի: Համապատասխանաբար նվազել են գործարանային եւ մեծածախ գները: Նշենք, որ այս որոշումը միանշանակ չընդունվեց ռուսական հասարակության շրջանում:
Հայաստանի պարագայում դա կարող է հանգեցնել շուկա «էժանացած» ռուսական օղու հոսքին: Անցյալ տարվա տվյալներով, տեղական շուկայում օղու ռեսուրսների կեսից ավելին (57.3%) կազմել է ներմուծումը: Նաեւ մեկ այլ խնդիր ստեղծվեց՝ հայ կոնյակ արտահանողների համար:
Քանի որ Ռուսաստանում կոնյակի նվազագույն գները չեն փոփոխվել, ալկոհոլային խմիչքների առումով կարող է ավելանալ օղու օգտագործման ծավալը: Դրան կնպաստի ընթացիկ տարում ավելի քան 9%-ով ռուսաստանցիների իրական աշխատավարձի կրճատումը: Հասկանալի է, որ այնտեղ հայկական կոնյակի իրացումը, որն այս տարի արդեն դանդաղել է, լուրջ խնդիրների կբախվի:
