Գյումրեցի Ավետիսյանների 7 հոգանոց ընտանիքի սպանությունից մեկ ամիս անց այսօր՝ փետրվարի 12-ին, մի խումբ քաղաքացիներ ՀՀ գլխավոր դատախազության շենքի մոտ բողոքի ակցիայով դատախազությունից պահանջեցին երաշխիքներ տալ, որ սպանության մեջ մեղադրվող Վալերի Պերմյակովը կհանձնվի հայ իրավապահներին (ֆոտոռեպորտաժ):
«Սպանությունից մեկ ամիս է անցել, բայց ժողովրդի մոտ դեռ շատ հարցականներ կան։ Պահանջում ենք, որ արդարություն հաստատվի, ոճրագործության մեջ մեղադրվողը հանձնվի հայ իրավապահներին: Քանի որ Գեւորգ Կոստանյանը ինքն էր կոնտակտ պերսոնան դարձել, դրա համար մեր պահանջներով նրան ենք դիմում, որ հրապարակեն եւ թափանցիկ դարձնեն գործընթացը: Որպես քաղաքացիներ մեզ համար պարզ չէ, թե ինչ է տեղի ունենում: Մենք երաշխիքներ ենք պահանջում, որպեսզի հաստատեն, որ մեղադրյալը դատվելու է ՀՀ օրենսդրությամբ»,-լրագրողների հետ զրույցում ասաց ակցիայի մասնակից, «Միանում եմ» նախաձեռնության անդամ Նարեկ Այվազյանը՝ նշելով, որ իրենք դատախազությունից պահանջում են նաեւ հրապարակել ռուսական կողմից ուղարկված դիմումի պատասխանը:
Բողոքի ակցիայի մասնակիցներն իրենց պահանջներով եւ կոչերով դատախազին ուղղված նամակ հանձնեցին եւ հեռացան: Նշենք, որ հավաքը բավական փոքրաթիվ էր՝ մեկ տասնյակ մարդ։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել հիվանդանոց, սակայն դեպքից 7 օր անց հիվանդանոցում մահացել էր նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
Հայաստանի Գլխավոր դատախազ Գեւորգ Կոստանյանը փետրվարի 3-ին նամակով դիմել էր Ռուսաստանի գլխավոր դատախազ Յուրի Չայկային՝ Ավետիսյանների ընտանիքի սպանության գործի վարույթը Հայաստանի իրավապահ մարմիններին փոխանցելու վերաբերյալ միջնորդությամբ:
Լուսանկարները՝ Արսեն Սարգսյանի /NEWS.am
