Քնած ժամանակ ադրբեջանցի Ռամիլ Սաֆարովի ձեռքով կացնահարված հայ սպա Գուրգեն Մարգարյանը լավ հայ էր, լավ մարդ, իր ազգի արժանի զավակը: Մարգարյանի սպանությունից 11 տարի անց նրան այսպես բնութագրեց դեպքի ժամանակ Բուդապեշտում գտնվող Հայկ Մակուչյանը:
«11 տարի անց նույն զգացողությունն ունեմ, ոչինչ չի փոխվել: Նույն ցավն է, նույն ապրումները, ոնց որ սպանության օրն էր»,- NEWS.am-ի հետ զրույցում ասաց Հայկը, որին նույնպես Սաֆարովը փորձել էր սպանել, սակայն, բարեբախտաբար, նրա սենյակի դուռը կողպված է եղել:
Հայկ Մակուչյանը մտահոգություն հայտնեց, որ ոճրագործը մինչեւ հիմա անպատիժ է, նույնիսկ Ադրբեջանի իշխանությունների կողմից պարգեւատրվել է եւ այժմ այնքան ազատ է իրեն զգում:
Ինչ վերաբերվում է ՄԻԵԴ ներկայացրած անհատական գանգատին, Մակուչյանը հայտնեց, որ այն դեռ վարույթ չի ընդունվել:
Նշենք, որ Գուրգեն Մարգարյանի իրավահաջորդները, ինչպես նաեւ մահափորձի ենթարկված սպա Հայկ Մակուչյանի ներկայացուցիչները 2013թ.-ին անհատական գանգատ են ներկայացրել ՄԻԵԴ: Գանգատում պահանջվում է ճանաչել, որ Հունգարիայի կողմից Ադրբեջանին մարդասպան Ռամիլ Սաֆարովի փոխանցումը եւ Ադրբեջանի կողմից նրա ներումը, ըստ էության` արդարացումը եւ հերոսացումը խախտում է Մարդու իրավունքների եվրոպական կոնվենցիայի 2-րդ հոդվածով (այն է՝ կյանքի իրավունք), 14-րդ հոդվածով (խտրականության արգելք) ամրագրված հիմնարար իրավունքները:
Հիշեցնենք, որ Թուրքիայում հատուկ պատրաստվածություն անցած Ադրբեջանի ԶՈւ սպա Ռամիլ Սաֆարովը 2004թ. փետրվարին մասնակցում էր ՆԱՏՕ-ի «Գործընկերություն հանուն խաղաղություն» ծրագրի շրջանակում անգլերենի դասընթացներին, որոնց մասնակցում էին նաեւ հայ սպաներ Գուրգեն Մարգարյանն ու Հայկ Մակուչյանը: Փետրվարի 19-ի գիշերը Սաֆարովը թաքուն մտել էր Գուրգեն Մարգարյանի սենյակը եւ կացնահարել քնած հայ սպային: Դրանից հետո Սաֆարովը փորձել էր սպանել Մակուչյանին, բայց վերջինիս սենյակի դուռը բարեբախտաբար փակ էր եղել: 2006թ. ապրիլին Սաֆարովը Բուդապեշտի դատարանի կողմից ցմահ ազատազրկման էր դատապարտվել` 30 տարի առանց ներման իրավունքի: 2012թ. օգոստոսի 31-ին Սաֆարովին արտահանձնեցին Ադրբեջանին, որտեղ մարդասպանին նախագահի կողմից ներում շնորհվեց, զինվորական բարձր կոչում տրվեց եւ միանվագ վճարվեց 8 տարվա աշխատավարձը:
