Մարտի 10-ին կկայանա «Բարգավաճ Հայաստան» կուսակցության 8-րդ համագումարը: Այս մասին հայտնեցին NEWS.am-ի աղբյուրները:
Մեր տեղեկություններով՝ համագումարում կքննարկվի եւ որոշում կկայացվի ԲՀԿ-ի հետագա գործունեության մասին: Ամենայն հավանականությամբ, հենց այդ ժամանակ էլ Գագիկ Ծառուկյանը կհայտարարի ԲՀԿ ղեկավարի պաշտոնից հրաժարվելու մասին, կկայանա ԲՀԿ ղեկավարի ընտրություն:
Նշենք, որ ԲՀԿ-ՀՀԿ առճակատումից, այնուհետեւ հաշտեցումից հետո կուսակցությունից սկսվել է մասսայական արտագաղթ: ԲՀԿ-ից դուրս գալու ու որպես անկախ պատգամավոր գործունեություն ծավալելու մասին արդեն հայտարարել է Արագած Ախոյանը, Կարո Կարապետյանը, Հարություն Ղարագյոզյանը, Գրիգորի Մարգարյանը, Դավիթ Քոչարյանը: Մեկ այլ ԲՀԿ-ական պատգամավոր՝ Մելիք Մանուկյանը,սխալմամբ մանդատից հրաժարվելու դիմում էր գրել, սակայն առաջիկայում պատրաստվում է հետ վերցնել այդ դիմումը եւ պարզապես դուրս գալ ԲՀԿ-ից՝ խմբակցության կազմում մնալով որպես անկախ պատգամավոր: Որոշ տեղեկություններով՝ ԲՀԿ-ից դուրս գալու մտադրություն ունեն նաեւ Ռուստամ Գասպարյանը, Մուշեղ Պետոյանը, Մարտուն Գրիգորյանը:
