ՀԱԿ-ը ոչնչով չի տարբերվում ՀՀԿ-ական այն պատգամավորներից, որոնք աչքի են ընկնում ոչ կոռեկտ արտահայտություններով: Այս մասին, այսօր՝ փետրվարի 24-ին, ԱԺ-ում հայտարարել է անկախ պատգամավոր Էդմոն Մարուքյանը՝ հավելելով, որ ԱԺ-ում իր երեկվա ելույթից հետո ինքը կանխատեսում էր, որ իր հասցեին վիրավորանքներ կհնչեն եւ դրանք հնչեցին:
«Ընդդիմությունը ոչնչով ավելի լավը չէ նրանցից, որոնց ինքը քննադատում է, եւ ես դրանում կրկին համոզվեցի»,-ասել է պատգամավորը՝ դիմելով ՀԱԿ-ի իր գործընկերներին:
«Իմ ելույթի ժամանակ դուք անընդհատ տեղից ինչ-որ բան էիք բղավում: Երբ իրենց նման բան են թույլ տալիս ՀՀԿ-ական պատգամավորները, դուք առաջինն եք հայտարարում, որ նրանք խանգարում են նիստի աշխատանքը: Իսկ հիմա դուք նույնն եք անում: Էլ ինչո՞վ եք տարբերվում ՀՀԿ-ի «ամենավատ» պատգամավորներից, որոնց միշտ օրինակ եք բերում»,-հայտարարել է Մարուքյանը:
Հիշեցնենք, որ երեկ՝ փետրվարի 23-ին, ԱԺ-ում հայտարարել էր, որ ՀԱԿ-ը չպետք է բողոքի ավտորիտարիզմից, քանի որ իրենց խմբակցությունը նախորդ տարվա դեկտեմբերին կողմ է քվեարկել ԵՏՄ-ին Հայաստանի անդամակցությանը:
