Ֆրանսիայի եւ Ուրուգվայի նախագահները դարձել են Հայոց ցեղասպանության 100-ամյակին նվիրված միջոցառումների նախապատրաստման տարածաշրջանային հանձնաժողովների պատվավոր նախագահները։ Այս մասին փետրվարի 25-ին խորհրդարանում հայտարարել է Հայաստանի Սփյուռքի նախարար Հրանուշ Հակոբյանը։
«Օտարազգի բարձրաստիճան քաղաքական գործիչներին այս գործընթացին ներգրավելը Հայաստանի ղեկավարության եւ հայկական սփյուռքի կառույցների փայլուն աշխատանքի արդյունքն է։ Աշխարհի տարբեր տարածաշրջաններում ստեղծվել են 61 հանձնաժողովներ, որոնցից յուրաքանչյուրը մշակել է 2014, 2015 եւ 2016թթ. միջոցառումների իր պլանը։ Նրանք ընդունել են «Հիշում եմ եւ պահանջում» մեր կարգախոսն ու միջոցառման խորհրդանիշ համարվող անմոռուկ ծաղիկը, որոնք հաստատվել են ՀՀ նախագահ Սերժ Սարգսյանի ղեկավարությամբ գործող միջոցառումների համակարգման հանձնաժողովի կողմից»,- հավելել է նա։