Թող այդ տիկինը գոնե չաղավաղի իրականությունը,- այսօր խորհրդարանում հայտարարել է ՀՅԴ խմբակցության ղեավար Արմեն Ռուստամյանը՝ մեկնաբանելով ԱՄՆ պետքարտուղարի՝ Եվրոպայի եւ Եվրասիայի հարցերով տեղակալ Վիկտորիա Նուլանդի հայտարարությունը։ Նուլանդը փետրվարի 17-ին Բաքվում հայտարարել էր, թե «Հայաստանի կողմից պահվող ադրբեջանցի գերիները պետք է վերադարձվեն»։ Փետրվարի 18-ին Նուլանդը ժամանել էր Հայաստան։
Ռուստամյանը նշել է, թե Հայաստանի ԱԳՆ-ն մի շարք հաջող եւ ճիշտ քայլեր է արել՝ կանխելու ադրբեջանական քարոզչությունը, բայց խորհրդարանականների հետ ջանքերը մեկտեղելը ծշատ օգտակար կլինի։ Անհրաժեշտ է, որ միջազգային հանրության գիտակցության մեջ ամրագրվի, թե Լեռնային Ղարաբաղը ոչ թե «գոյություն չունեցող» պետություն է՝ «գոյություն չունեցող» դատարանով, այլ դե-ֆակտո ճանաչված պետություն։ Եւ եթե այնտեղ հանցագործություն է կատարվում, հանցագործներին հանձնելու խնդրանքով պետք է նախ դիմել այդ պետությանը։
«Իսկ միջնորդները պետք է նախ դիմեն Ադրբեջանին եւ հրապարակային խոստովանեն, որ Ղարաբաղում դատապարտված անձինք հանցագործներ են։ Եւ թող այդ տիկինը գոնե չաղավաղի իրականությունը, թե դա մարդասիրական քայլ կլինի։ Սա լիովին այլ իրավիճակ է, այլ ոչ ռազմական հանցագործություն։ Բայց դա գֆիտենք միայն մենք, կամ մեզնից բացի քչերը։ Պետք է այդ փաստը ճիշտ մատուցել միջազգային հանրությանը»,- նշել է Ռուստամյանը։
Հիշեցնենք, որ ավելի վաղ ԼՂՀ ոստիկանությունը տարածել էր, որ Ադրբեջանի քաղաքացիներ Շահբազ Գուլիեւը (1968թ. ծնված), Դիլհամ Ասկերովը (1960թ. ծնված), ինչպես նաեւ սպանված երրորդ մասնակից Հասան Հասանովը, ունենալով զենք եւ զինամթերք, 2014թ. հունիսի 29-ին ապօրինաբար հատել էին ԼՂՀ պետական սահմանը եւ ներխուժել Հանրապետության Շահումյանի շրջանի տարածք՝ հետախուզական գործողությունների նպատակով: Տվյալ անձինք հատուկ առաջադրանքոց տեղեկություններ էին հավաքել եւ լրտեսական գործունեություն իրականացրել: Ավելին, նրանք զենքի գործադրմամբ հուլիսի 4-ին առեւանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ եւ Մանաշիդ համայնքների միջեւ ընկած անտառային զանգվածում: Բացի այդ, Հասանովը հուլիսի 11-ի երեկոյան Վարդենիս-Քարվաճառ ճանապարհի 32-րդ կմ-ին ազգային ատելության հողի վրա հրազենով սպանել էր Երեւանի բնակիչ Սարգիս Աբրահամյանին (1971թ. ծնված), իսկ Կոտայքի մարզի Ձորաղբյուր գյուղի բնակիչ Կարինե Դավթյանին հրազենային վնասվածքներ էր հասցրել: Նա զինված դիմադրություն էր ցույց տվել ձերբակալման ժամանակ եւ վնասազերծվել:
Նշենք, որ ԼՂՀ ընդհանուր իրավասության առաջին ատյանի դատարանի վճռով Դիլհամ Ասկերովը դատապարտել է ցմահ, իսկ Գուլիեւն էլ 22 տարվա ազատազրկման: