Շաբաթ օրը՝ հուլիսի 24-ին, տեղի է ունենալու Հանրային խորհրդի նախագահ Վազգեն Մանուկյանի դստեր՝ Արեւիկի հարսանիքը: Այս մասին տեղեկացնում է «168» ժամ շաբաթաթերթն իր հուլիսի 22-ի համարում: Փեսացուն ՀՅԴ անդամ Ռուբինա Ղազարյանի որդին՝ Սահրադ Պետրոսյանն է: Հարսանիքը տեղի է ունենալու «Օջախ» ռեստորանում: Ռուբինա Ղազարյանը «Երկիր մեդիա» հեռուստաընկերության առաջին տնօրենն է եղել: Ըստ «168 ժամ»-ի, փեսացուի ընտանիքին է պատկանում Նալբանդյան փողոցի վրա գտնվող «Ստեֆանել» հագուստի խանութը: Իսկ Մանուկյանին է պատկանում Աբովյան փողոցի վրա գտնվող «Մոտտիվի» հագուստի խանութը: Ի դեպ, փեսացուի գերդաստանը Հայաստան է եկել Իրանից: Սահրադը ճարտարապետ է, եւ պարզվում է՝ «Մոսկվա» կինոթատրոնի ամառային դահլիճը քանդելու դեմ պայքարող ճարտարապետներից մեկն էր: Այդ դահլիճի քանդմանը, հիշեցնենք, դեմ էր նաեւ Վազգեն Մանուկյանի ղեկավարած Հանրային խորհուրդը:
NEWS.am-ի տեղեկություններով ՝ հարսանիքին հրավիրված է իշխանական գրեթե ողջ էլիտան՝ Սերժ Սարգսյանը, Վազգեն Մանուկյանի նախկին կուսակից, Հայաստանի վարչապետ Տիգրան Սարգսյանը, ՀՀ ԱԳ փոխնախարար Շավարշ Քոչարյանը, ԱԺԴ նախագահ Արշակ Սադոյանը, եւ իհարկե դաշնակցական առաջին դեմքերը:
