Միասնական արժույթի անցնելու պարագայում Հայաստանը շահած դուրս կգա: Այս մասին NEWS.am-ի թղթակցի հետ զրույցում ասաց ԲՀԿ-ական նախկին պատգամավոր, տնտեսագետ Վարդան Բոստանջյանը:
Նա միանգամայն հավանական է համարում միասնական արժույթին անցնելը: «Ես չեմ զարմանում, մինչեւ անգամ չեմ զայրանում այդ կապակցությամբ, գիտեմ որ տնտեսական միությունները բավականաչափ հավանականություն ունեն միասնական արժույթի անցնելու, դրա վառ վկայությունը Եվրամիությունն է, որի անդամ 28 երկրներում շրջանառությունը իրականացում են եվրոյով: ԵՏՄ-ում, որին անդամակցել ենք մենք, եւս կարող են դիտարկել, միասնական արժույթի անցնելու խնդիրները»,-ասաց Վարդան Բոստանջյանը: Իսկ թե
երբ կլինի դա կամ կլինի, թե չի լինի, հայտնի չէ, տնտեսագետը շեշտեց, որ դրա համար ժամանակ է պահանջվում, շուտափույթ չի կարող լինել, քանի որ դա ենթադրում է բազմաթիվ դրամական հարաբերությունների կանոնակարգում, համապատասխանեցում երկրում գոյոություն ունեցող զարգացումներին, կոորդինացում:
Թե ինչպես կազդի միասնական արժույթի անցնելը Հայաստանի վրա, Վարդան Բոստանջյանը նշեց, որ ի սկզբանե տնտեսական միություններում գտնվելը ինքնիշխանության, ինքնուրույության կորուստ է, բայց դա կփոխհատուցվի նրանով, որ միասնական արժույթի պարագայում Հայաստանը շահած դուրս կգա: «Միայն այն հանգամանքը, որ բավական թվով հայեր գտնվում են այդ տարածաշրջանում, խոսքը միգրանտների մասին է, ովքեր փոխանկման կուրսերի պարագայում ունենում են կորուստներ, իսկ հիմա դա չեն ունենա»,-ասաց տնտեսագետը:
Նշենք, որ ՌԴ նախագահ Վլադիմիր Պուտինը հանձնարարել է ՌԴ ԿԲ-ին աշխատանք սկսել ԵՏՄ միասնական արժույթի ստեղծման ուղղությամբ:
